Монгол Улс 2026 онд НҮБ-ын цөлжилттэй тэмцэх XVII бага хурлыг зохион байгуулах гэж байна. Тус хурлыг зохион байгуулах дэд хороод байгуулагдаж, Үйлчилгээ, хоол, хүнсний хангамж, эрүүл ахуйн дэд хорооны ахлагчаар Улаанбаатар хотын Ерөнхий менежер бөгөөд Захирагчийн ажлын албаны дарга Г.Батзориг томилогдлоо. Мөн гишүүнээр Монгол Улсын Ерөнхийлөгчийн Үйлдвэр, үйлчилгээний бодлогын зөвлөх Ч.Даваабаяр болон ХХААХҮЯ, ЭМЯ, НЭМҮТ, ОБЕГ зэрэг төрийн болон төрийн бус байгууллагын төлөөллүүд ажиллахаар боллоо.
Үйлчилгээ, хоол, хүнсний хангамж, эрүүл ахуйн дэд хорооны чиг үүрэг:
- Хоол хүнсний аюулгүй байдлыг хангах
- Эрүүл аюулгүй хоол, ундны үйлчилгээ үзүүлэгчид, түүнчлэн тусгай хэрэгцээт үйлчлүүлэгчдэд үйлчилгээ үзүүлэгч нарын төлөвлөлт, түүний бэлтгэл, зохион байгуулалтыг хариуцан ажиллах
- Хог хаягдалгүй, байгальд ээлтэй үндэсний хоол үйлдвэрлэл эрхлэгчдийг дэмжих, танилцуулах
- Хоол хүнсний аюулгүй байдлын стандарт, журам мөрдүүлэх, хоол хүнсэнд эрүүл ахуйн шалгалт хийх
Цөлжилттэй тэмцэх НҮБ-ын конвенц (UNCCD) нь дэлхийн 197 улс нэгдэн орсон, олон улсын ган болон газрын доройтолтой тэмцэх чиглэлээр хэрэгжүүлж буй гол эрх зүйн баримт бичиг юм. Энэхүү конвенцын зорилго нь цөлжилт, газрын доройтол, уур амьсгалын өөрчлөлтөөс үүдэлтэй сөрөг үр дагаврыг бууруулах, тогтвортой газар ашиглалтыг дэмжихэд чиглэдэг дэлхий нийтийн хамтын үйл ажиллагааг эрчимжүүлэх олон улсын чухал индэр юм.
Энэхүү хурлыг эх орондоо зохион байгуулснаар:
-Монгол Улс дэлхийн улс орнуудтай ногоон эрчим хүч, усны аюулгүй байдал, ногоон хөгжлийн зохистой менежментийн чиглэлээр илүү идэвхтэй хамтран ажиллах боломж нэмэгдэх,
-Олон улсын анхаарлыг Монголын цөлжилт, усны асуудал руу татаж унаган байгалиа онгон дагшнаар нь хадгалж үлдэх,
-Шийдвэр гаргагчид, санхүүжилт, хөрөнгө оруулалтыг татах боломжийг нээж, ногоон хөгжлийн томоохон төслүүдийг хэрэгжүүлэх зэрэг олон талын ач холбогдолтой.
Монгол Улс энэхүү конвенцын 17 дугаар талуудын бага хурлыг эх орондоо зохион байгуулахаар бэлтгэл ажлаа хангаж байна. Энэ нь олон улсын түвшинд Монгол Улсын байр суурийг бэхжүүлэхийн зэрэгцээ цөлжилт, газрын доройтол, бэлчээрийн менежмент, уур амьсгалын өөрчлөлтийн асуудлыг хэлэлцэж, бодит шийдэл гаргахад хувь нэмэр оруулах ач холбогдолтой юм.
