Улсын Их Хурлын гишүүн М.Мандхайгийн санаачилсан “Хөдөө аж ахуйн тухай” хуулийн төслийн үзэл баримтлалыг олон нийтэд танилцуулах хэлэлцүүлэг боллоо.
Хэлэлцүүлгийн үеэр УИХ-ын гишүүн М.Мандхай хуулийн төслийг боловсруулсан эрх зүйн үндэслэл, бодит нөхцөл байдлын шаардлагыг дэлгэрэнгүй танилцуулж, хөдөө аж ахуйн салбарыг тогтвортой хөгжүүлэхэд тулгамдаж буй асуудлуудыг хөндөв.
Хэлэлцүүлэгт УИХ-ын гишүүн М.Ганхүлэг, Б.Бат-Эрдэнэ, Л.Соронзонболд нар, Монгол Улсын Ерөнхийлөгчийн Үйлдвэр, үйлчилгээний бодлогын зөвлөх Ч.Даваабаяр, Хүнс, Хөдөө аж ахуй, хөнгөн үйлдвэрийн Сайдын зөвлөх Т.Мөнхтөр, ХХААХҮЯ-ны удирдлагууд болон Шинэ хоршоо хөдөлгөөний салбар дундын уялдааг хангах Үндэсний хорооны ажлын албаны төлөөлөл, мөн холбогдох салбарын 100 гаруй төлөөлөгч оролцлоо.
Төслийн үзэл баримтлалд дурдсанаар, хөдөө аж ахуйн үйлдвэрлэл байгаль, уур амьсгалын эрсдэлд эмзэг, түүхий эдийн чанар, өртөг шингээлт сул, дотоодын үйлдвэрлэл гадаад зах зээлтэй өрсөлдөх чадваргүй байгаа зэрэг асуудлуудыг цогцоор нь авч үзэн, эрх зүйн шинэ орчин бүрдүүлэх шаардлагатай гэж үзжээ.
Хуулийн төсөл нь хөдөө аж ахуйн үйлдвэрлэлийн төрөл, бүсчлэл, өртгийн сүлжээ, эрсдэлийн үнэлгээ, удирдлага, төрийн дэмжлэгийн бодлогын зохицуулалтыг багтаасан 6 бүлэгтэй байхаар төлөвлөгдсөн байна. Түүнчлэн тогтвортой үйлдвэрлэл, нөөцийн зохистой ашиглалт, чанарт суурилсан үнэлгээний тогтолцоо бий болгох, үйлдвэрлэл эрхлэгчдийн оролцоо, хариуцлагыг нэмэгдүүлэх эрх зүйн үндсийг тодорхойлжээ.
