Эрүүл мэндийн сайд, Боловсрол, шинжлэх ухааны сайдын хамтарсан тогтоолоор ‘’Эрүүл шүд’’ арга хэмжээний төлөвлөгөөг 2024-2027 онд хэрэгжүүлэхээр баталж, зургаан зорилтын хүрээнд 40 арга хэмжээг хэрэгжүүлэхээр баталсан.
Тус хөтөлбөрийн хүрээнд 2025 онд амны хөндийн өвчлөлийг бууруулах, эрсдэлт хүчин зүйлсийг хязгаарлах, урьдчилан сэргийлэлтийн үйл ажиллагааг сайжруулах, эрүүл мэндийн боловсрол олгох зорилгоор “Бэлгээ бэлдье” арга хэмжээг зохион байгуулахаар болжээ. Жил бүрийн зургаадугаар сарын 1-нд тэмдэглэдэг Хүүхдийн эрхийг хамгаалах өдрөөр хүүхдүүдэд сахрын агууламж өндөртэй бэлэг өгөх нь амны хөндийн өвчлөл болон дархлааны тогтолцоонд сөргөөр нөлөөлдгийг мэргэжилтнүүд анхааруулдаг. Иймд эл арга хэмжээний хүрээнд элдэв чихэр, амттанаас татгалзаж, үүний оронд эрүүл мэндийн үзлэг, боловсрол, зөвлөгөө зэрэг урьдчилан сэргийлэх арга хэмжээг зохион байгуулахаар болсон байна.
Энэ хүрээнд эхний шатны арга хэмжээг Хан-Уул дүүргийн 12 дугаар хорооны Ерөнхий боловсролын 10 дугаар сургуулийн 1070 хүүхдэд зохион байгуулж байна. Үүнд шүд, нүд, арьс харшил, гэмтэл, хоол зүй зэрэг эрт илрүүлгийн үзлэг багтсан бөгөөд хамтад нь эрүүл мэндийн боловсрол олгож байна.
