Монгол Улсын Ерөнхийлөгчийн Үйлдвэр, үйлчилгээний бодлогын зөвлөх Ч.Даваабаяр Хөдөө аж ахуйн их сургуульд KOICA-ийн төслийн хүрээнд зохион байгуулагдаж буй Хөдөлмөрийн үзэсгэлэн яармагтай танилцлаа. Хөдөө аж ахуйн их сургуулийн Мал аж ахуй, биотехнологийн сургуулийн захирал Д.Гүрбазар сургууль болон тус үзэсгэлэн яармагийн үйл ажиллагааг танилцууллаа.
Тус үзэсгэлэн яармаг нь ХААИС, МААБС-ийн төгсөгчдийн хөдөлмөр эрхлэлтийг дэмжих зорилготой бөгөөд хүнс, хөдөө аж ахуйн салбарын төлөөлөл бүхий Сүү ХК, Витафит групп, Тэсо фүүдс ХХК, АПУ Дэйри ХХК, Жүр Үр бэйкери зэрэг үндэсний томоохон үйлдвэрлэгч, аж ахуйн нэгжүүдийн хүний нөөцийн ажилтнууд оролцон ажлын байрыг танилцуулж, шаардлага хангасан төгсөгчдийг ажлын байраар хангах юм. Мөн уг арга хэмжээнд НҮБ-ын ХХААБ(FAO) болон Гацууртын хүний нөөцийн мэргэжилтнүүд тусгай лекцийг тавьж, оюутан залууст зөвлөгөө өглөө.
KOICA нь Монгол улсын урт хугацааны хөгжлийн бодлого, Засгийн газрын үйл ажиллагааны төлөвлөгөө, мөн БНСУ-ын Засгийн газраас Монгол улстай хамтран ажиллах стратеги(CPS)-ийн дагуу олон төрлийн төслийг хэрэгжүүлж байна.
Тухайлбал, үндсэн төслүүд болох
- Прожект төсөл
- Түншлэлийн төсөл
- Сургалтын төсөл (CIAT)
- Сайн дурын ажилтан томилох зэрэг хөтөлбөрүүдийг Монгол улсын засгийн газар, БНСУ-ын төрийн байгууллагууд, хувийн хэвшлийн мэргэжилтнүүд, иргэний нийгэм, эрдэм шинжилгээний байгууллагуудтай хамтран хэрэгжүүлж байна.
KOICA нь хамтын ажиллагаагаар дамжуулан БНСУ-ын туршлага болон технологийн чадавхийг үр дүнтэй ашиглах боломжтой платформын үүргийг гүйцэтгэж ирсэн бөгөөд Монгол улсын тогтвортой хөгжилд дэмжлэг үзүүлэхийг зорьж байгаа юм.
