Улсын Их Хурлын гишүүн М.Мандхайгийн санаачилсан “Хөдөө аж ахуйн тухай” хуулийн төслийн үзэл баримтлалыг олон нийтэд танилцуулж, оролцогчдын санал, зөвлөмжийг авах хоёр дахь хэлэлцүүлэг боллоо.
Хэлэлцүүлэгт УИХ-ын гишүүн, ажлын хэсгийн ахлагч М.Мандхай, Монгол Улсын Ерөнхийлөгчийн Үйлдвэр, үйлчилгээний бодлогын зөвлөх Ч.Даваабаяр, “Хүнсний хувьсгал” мэргэжлийн холбооны гүйцэтгэх захирал Б.Баярцэцэг болон хөдөө аж ахуйн чиглэлийн эрдэм шинжилгээний байгууллага, салбарын мэргэжлийн холбоодын төлөөллүүд оролцож, санал солилцлоо.
Хэлэлцүүлгийн үеэр УИХ-ын гишүүн М.Мандхай хуулийн төслийг боловсруулсан эрх зүйн үндэслэл, бодит нөхцөл байдлын шаардлагыг дэлгэрэнгүй танилцуулж, хөдөө аж ахуйн салбарыг тогтвортой хөгжүүлэхэд тулгамдаж буй асуудлуудыг хөндөв.
Төслийн үзэл баримтлалд дурдсанаар, хөдөө аж ахуйн үйлдвэрлэл байгаль, уур амьсгалын эрсдэлд эмзэг, түүхий эдийн чанар, өртөг шингээлт сул, дотоодын үйлдвэрлэл гадаад зах зээлтэй өрсөлдөх чадваргүй байгаа зэрэг асуудлуудыг цогцоор нь авч үзэн, эрх зүйн шинэ орчин бүрдүүлэх шаардлагатай гэж үзжээ.
