“Хүнсний хангамж, аюулгүй байдал” үндэсний хөдөлгөөний хэрэгжилт, үр дүнтэй танилцах зөвлөлдөх уулзалт Дорноговь аймагт болж, аймгийн Засаг дарга О.Батжаргал нээж үг хэллээ.
Монгол Улсын Ерөнхийлөгчийн Үйлдвэр, үйлчилгээний бодлогын зөвлөх Ч.Даваабаяр “Хүнсний хангамж, аюулгүй байдал” үндэсний хөдөлгөөний хүрээнд улс даяар хийгдэж буй үйл ажиллагаа, дэвшүүлж буй зорилтуудын талаар танилцуулж, орон нутгийн 200 гаруй хүнсний үйлдвэрлэл эрхлэгчидтэй санал солилцлоо.
Дорноговь аймагт “Хүнсний хангамж, аюулгүй байдал” үндэсний хөдөлгөөний хүрээнд олгогддог хөнгөлөлттэй зээлд найман сумын 38 иргэн, ААН хамрагдан, хамгаалагдсан хөрсний тариалалтыг 7600 м2-аар, хүнсний ногооны зоорийн хангамжийг 30,49 хувиар, төмс, хүнсний ногооны хангамжийг 2,05 хувиар нэмэгдүүлсэн байна.
Ингэхдээ:
- Махны хэрэгцээг 100%,
- Сүүний хэрэгцээний 76,3%,
- Гурилан бүтээгдэхүүний хэрэгцээний 6,62%,
- Төмс, хүнсний ногооны 25,34 %,
- Өндөгний 73,6%-ийг орон нутгаас хангаж байна.
Дорноговь аймгийн засаг дарга О.Батжаргал:
Манай аймагт тус хөдөлгөөн үр дүнтэй хэрэгжиж байна. Учир нь хүнсний худалдаа, хүнс, хоол үйлдвэрийн салбарт 2022 онд нийт 438 иргэн, ААН үйл ажиллагаа явуулж байсан бол 2025 онд 557 болж 27%-аар өсөж, нийт 226 ажлын байрыг бий болгосон бөгөөд 2023-2024 онд төв, суурин газрын хүн амын хүнсний хангамжаа 16.9 хувиар өсгөж чадсан юм.
Цаашид дараах үйл ажиллагааг эрчимжүүлэн хэрэгжүүлэх шаардлагатай байгаа юм.
- Үйлдвэрлэл эрхлэгчдэд олгох хөнгөлөлттэй зээлийн санхүүжилтийг нэмэгдүүлэх,
- Арилжааны банкны зээлийн шалгуурыг зээл хүсэгчдийн боломжит нөхцөлтэй уялдуулан уян хатан болгох,
- Салбарын боловсон хүчнийг бэлтгэх, чадавхжуулах асуудлыг бодлогоор дэмжих.
Мөн Дорноговь аймгийн хүнсний салбарын баялаг бүтээгчид Бүсчилсэн хөгжлийн бодлогын хүрээнд “Хүнсний хувьсгал” үндэсний хөдөлгөөний 2 дугаар шатыг эхлүүлэн эрчимжүүлж, жижиг дунд үйлдвэрлэлийг дэмжих хэрэгтэйг хэлж байв.
