Монгол Улсын Ерөнхий сайд Л.Оюун-Эрдэнэ, ХХААХҮ-ийн сайд Ж.Энхбаяр, Монгол Улсын Ерөнхийлөгчийн Үйлдвэр, үйлчилгээний бодлогын зөвлөх Ч.Даваабаяр болон албаныхан Говийн бүсийн зөвлөлийн анхдугаар хуралдааны хүрээнд Дорноговь аймгийн төв талбайд зохион байгуулагдаж буй “Түншлэл-Хамтын ажиллагаа” үзэсгэлэнтэй танилцлаа.
Үзэсгэлэнд Дорноговь, Өмнөговь, Говьсүмбэр, Дундговь аймгийн жижиг, дунд үйлдвэрлэл эрхлэгч, хоршоо болон өрхийн үйлдвэрлэгчид бараа, бүтээгдэхүүнээ дэлгэжээ. Говийн бүсийн хэмжээнд нийт 5121 аж ахуйн нэгж үйл ажиллагаа эрхэлж байгаагаас Дорноговь аймагт 1367, Говьсүмбэр аймагт 378, Дундговь аймагт 880, Өмнөговь аймагт 2496 ААН үйл ажиллагаа явуулж байна.
Говийн бүсэд хүнсний үйлдвэрлэл, хөнгөн үйлдвэрлэл, боловсруулах үйлдвэрлэл, сүү цагаан идээ, аялал жуулчлал, бэлэг дурсгал, үндэсний хувцас, модон суран эдлэл чиглэлээр түлхүү оролцож байгаа нь цаашид орон нутгийн онцлогийг шингээсэн, газар зүйн заалттай, өвөрмөц, орц найрлага, хийц загвар бүхий “Бүсийн брэнд бүтээгдэхүүн”-ийг бий болгон хөгжүүлэх боломжтой юм.
Уг арга хэмжээ нь орон нутгийн аялал жуулчлал, зочлох үйлчилгээний салбарын хамтын ажиллагаа, түншлэлийг бэхжүүлэх, брэнд бүтээгдэхүүнээ таниулах, сайн туршлагаа хуваалцах, аж ахуйн нэгж, байгууллагуудын уялдааг сайжруулах зорилготой юм.
