2025 оны дөрөвдүгээр сард улсын хэмжээнд хэрэглээний үнийн индекс өмнөх сараас 0.3 хувиар, өмнөх оны мөн үеэс 8.6 хувиар өссөн байна. Өмнөх саруудтай харьцуулахад сарын инфляц сүүлийн долоон сарын хугацааны хамгийн бага дүнгээр өсжээ.

Индексийг бүлэг тус бүрээр авч үзвэл хүнсний үнийн индекс 6.8 хувь, хүнсний бус бүлгийн үнэ 9.4 хувь, барааны үнийн индекс 6 хувийн өсөлттэй, үйлчилгээний үнийн индекс хамгийн өндөр буюу 17 хувиар өссөнийг ҮСХ мэдээллээ.

Инфляцын түвшин буюу хэрэглээний бараа, үйлчилгээний үнэ 2024 оны 4 дүгээр сард 5.7 хувь байсан бол 2025 оны 4 дүгээр сард 8.6 хувь болж, өсөлтийн хурдац өмнөх оны мөн үеэс 2.9 нэгж хувиар өссөн байна.

Улсын инфляцад бензин, түлшнээс бусад импортын барааны үнэ 2.6 нэгж хувиар (29.8%), мах, хатуу түлшнээс бусад дотоодын барааны үнэ 5.0 нэгж хувиар (58.1%) тус тус нөлөөлсөн байна.

Инфляцын түвшин буюу хэрэглээний бараа, үйлчилгээний үнэ 2025 оны 4 дүгээр сард улсын хэмжээнд 8.6 хувь
гарсны 1.9 (22.3%) нэгж хувь нь хүнсний бараа, ундаа, усны бүлгийн үнийн өсөлтөөс шалтгаалсан байна.

Хэрэглээний бараа, үйлчилгээний үнэ 2025 оны 4 дүгээр сард өмнөх оны мөн үеэс 8.6 хувиар өсөхөд

• хүнсний бараа, ундаа, усны бүлгийн үнэ дүнгээрээ 6.9 хувь (согтууруулах бус ундааны дэд бүлгийн үнэ 10.5 хувь), 
• хувцас, бөс бараа, гутлын бүлгийн үнэ дүнгээрээ 9.1 хувь, 
• орон сууц, ус, цахилгаан, хийн болон бусад түлшний бүлгийн үнэ дүнгээрээ 21.7 хувь, 
• гэр ахуйн тавилга, гэр ахуйн барааны бүлгийн үнэ дүнгээрээ 6.5 хувь, 
• зочид буудал, нийтийн хоол, дотуур байрны үйлчилгээний бүлгийн үнэ дүнгээрээ 16.7 хувь, 
• боловсролын үйлчилгээний бүлгийн үнэ дүнгээрээ 18.2 хувиар тус тус өссөн нь голлон нөлөөлсөн байна. 

Хэрэглээний бараа, үйлчилгээний үнэ 2025 оны 4 дүгээр сард өмнөх сараас 0.3 хувиар өсөхөд

• хүнсний бараа, ундаа, усны бүлгийн үнэ дүнгээрээ 0.9 хувь, 
• орон сууц, ус, цахилгаан, хийн болон бусад түлшний бүлгийн үнэ дүнгээрээ 0.7 хувь, 
• даатгал, санхүүгийн үйлчилгээний бүлгийн үнэ 3.9 хувиар өссөн нь голлон нөлөөлсөн байна.

Эх сурвалж: ҮСХ