Монгол Улсын Ерөнхийлөгчийн Үйлдвэр, үйлчилгээний бодлогын зөвлөх Ч.Даваабаяр “Хүнсний хангамж, аюулгүй байдал” үндэсний хөдөлгөөний хүрээнд Говьсүмбэр аймагтаа ангилсан махны үйлдвэрлэл эрхэлж буй “Говийн брэнд ангилсан мах”-ны дэлгүүрийн үйл ажиллагаатай танилцлаа.
Тус дэлгүүр нь 2011 оноос эхлэн үйл ажиллагаа явуулж байгаа бөгөөд “Хүнсний хангамж, аюулгүй байдал” үндэсний хөдөлгөөний хүрээнд олгогддог хөнгөлөлттэй зээлд хамрагдаж мах хадгалах 40 тн багтаамжтай, бүрэн тоноглогдсон хөргүүртэй зоорь барьжээ. Мөн гурван хүнийг ажлын байраар хангадаг бөгөөд бүх тоног төхөөрөмж нь хүний оролцоогүй бүрэн автомат үйл ажиллагаатай юм.
Түүхий эд болох хонь, ямаа, үхэр, адуугаа Дундговь аймгийн малчдаас худалдан авч, ариун цэврийн шаардлага хангасан үйлдвэрийн нөхцөлд өөрсдөө төхөөрдөг. Ингэхдээ сар бүр Говьсүмбэр аймгийн лабораторид махны антибиотикийн үлдэгдлийг шинжлүүлэн таван цул, гүзээний бууз, хонины элэг сэмж, махан таташ зэрэг 20 гаруй нэр төрлийн махан бүтээгдэхүүний бэлдцийг борлуулдаг байна.
“Говийн брэнд ангилсан махны дэлгүүр”-ийн захирал Ц.Мөнх-Эрдэнэ: Тэрээр “Төр засгаас үндэсний үйлдвэрлэгчдийг бодлогоор дэмжиж, хөнгөлөлттэй зээл олгож буй явдал маш зөв гэж үздэг. Манай дэлгүүр хэдийнээ Говьсүмбэр аймгийн иргэдэд танигдаж, нутгийн брэнд бүтээгдэхүүнд үйлдвэрлэж чаддаг болсон. Манай аймаг гурван аймгийн уулзвар дээр байдаг онцлогтой. Малын бойны газраас хаягдаж байгаа малын дотор гэдэс, толгой шийрийг өөрсдөө үйлдвэрийн аргаар цэвэрлэж бэлтгээд экспортод гаргах асар их боломж байна.
“Хүнсний хувьсгал” хөдөлгөөний хоёрдугаар шат хөдөө орон нутагт хэрэгжиж эхэлбэл уг давуу талаа ашиглан үйлдвэрийн хүчин чадлаа нэмэх хүсэлтэй байгаа” гэж байв.
