Тамхи, амьдралын идэвхгүй хэв маяг болон бусад муу зуршлууд зүрхний үйл ажиллагаанд муугаар нөлөөлдөг гэдгийг хүн бүр мэднэ. Үүнээс гадна таны хооллолт ч зүрхний асуудалтай нүүр тулахгүй байхад чухал үүрэг гүйцэтгэдэг гэдгийг санаарай. Саяхан Америкийн Зүрх Судасны холбооны мэргэжилтнүүд зүрхэнд сөргөөр нөлөөлөх хүнсний бүтээгдэхүүний жагсаалтыг гаргасан бөгөөд хэрвээ та зүрхэндээ анхаардаг бол уг бүтээгдэхүүнүүдээс татгалзах хэрэгтэй аж.
1. Бекон
Жон Хопкинсын Их Сургуулийн зүрхний эмч Франсуаза өвчтөнүүддээ бекон бага хэрэглэхийг зөвлөдөг. Учир нь ханасан өөх тос нь цусан дахь холестерины түвшнийг нэмэгдүүлдэг бөгөөд энэ нь зүрхний шигдээс, цус харвалтад хүргэдэг аж. “Беконыг бэлтгэхэд давс, элсэн чихэр, нитрит зэргийг нэмж хатаах арга замыг ашигладаг. Тиймээс энэ аргаар боловсруулсан махны давс нь цусны даралтыг нэмэгдүүлж, бие организмын усыг гадагшлуулахгүй барьдаг учир зүрхний ачааллыг нэмэгдүүлдэг юм. Энэ нь мэдээж, зүрх судасны өвчин тусах эрсдэлийг бий болгоно” гэсэн байна.
2. Элэг
Стэнфордын Их сургуулийн зүрхний эмч Элеонора Левин хэзээ ч элэг иддэггүй гэнэ. Тэрээр элгийг маш их өөхтэй гэж үздэг байна. “Би улаан мах идэхээс татгалздаг. Яагаад гэвэл улаан мах нь ханасан өөх тос, транс тос ихтэй байдаг бөгөөд зүрхэнд асуудал үүсгээд зогсохгүй, ясны сийрэгжилт үүсэхэд нөлөөлдөг. Мөн аливаа амьтаны элэг нь биед орж буй бүхий л зүйлсийг хоргүйжүүлэх шүүлтүүрийн үүргийг гүйцэтгэдэг бөгөөд бүх хорт бодис элгэнд үлдсэн байдаг. Хүүхэд байхдаа би элэг иддэг байсан ч зүрхний эмч болсноосоо хойш огт идээгүй” гэжээ.
3. Донат
Атлантын зүрх судасны эмч Жейн Морганы үзэж байгаагаар донатыг транс тос агуулсан тосон дээр шардаг учир энэ нь зүрхний өвчин үүсгэхэд хүргэдэг байна. “Транс тос нь холестерины түвшнийг нэмэгдүүлээд зогсохгүй, цусан дахь сахрын түвшнийг нэмэгдүүлж, чихрийн шижин 2-р зэрэг, зүрх судасны өвчин, цус харвалтад хүргэх эрсдэлтэй. Тиймээс донат худалдаж авах үедээ орцыг нь сайн харах хэрэгтэй” хэмээн зөвлөжээ.
4. Стейк
Фолкнерийн эмнэлгийн зүрх судасны тасгийн эрхлэгч Леонард Лилли хэзээ ч өөх, мах алагласан стейк иддэггүй талаараа дурдсан. Гэхдээ энэ төрлийн махыг хааяа идэхэд буруудахгүй. “Би хэт их өөхтэй улаан махнаас татгалздаг. Учир нь энэ төрлийн мах нь ханасан өөх тос ихээр агуулдаг. Клиникийн судалгаанаас харахад ханасан өөх тос хэтрүүлэн хэрэглэх нь зүрх судасны өвчин, хавдар, чихрийн шижин тусах эрсдэлийг нэмэгдүүлдэг” гэжээ.
5. Шарсан тахианы мөч
Шарсан тахианы мөчийг тогтмол идэх нь зүрх судасны өвчин болон цус харвалтыг үүсгэх эрсдэлтэй. Учир нь энэ нь бие организм дахь ханасан өөх тос, транс тосны түвшнийг нэмэгдүүлдэг. Зүрхний эмч Санжай Маниарагийн хэлж байгаагаар тэр шарсан тахианы мөч бараг л иддэггүй гэнэ. Энэ төрлийн хоолыг тогтмол хэрэглэх нь бие организм дахь “муу” холестерины түвшнийг нэмэгдүүлж, харин “сайн” холестерины түвшнийг бууруулдаг аж. Тиймээс хэрвээ та шарсан тахиа идмээр байвал тосонд шарсан бус харин грилл дээр шарсан тахиаг идэх нь илүү тохиромжтой.
6. Хиам
Миннеаполисын зүрхний эмч Элизабет Клодас нь хиамыг огт иддэггүй гэнэ. Учир нь хиам нь цусны даралт нэмэгдүүлдэг натри, холестерины түвшин нэмэгдүүлдэг ханасан өөх тос ихээр агуулсан байдаг гэнэ. Клодас бүхий л хагас боловсруулсан бүтээгдэхүүн болох зайдас, утсан гахайн мах, бекон зэргийг ДЭМБ-аас хавдар үүсгэх магадлалтай гэж тогтоосон болохыг дурджээ.
7. Маргарин
Маргарин, цөцгийн тос болон бусад төрлийн тослог ихтэй бүтээгдэхүүн нь зүрхний үйл ажиллагаанд сөргөөр нөлөөлдөг. Зүрхний эмч Хармони Рейнольдын 16 жилийн турш хийсэн судалгаанаас харахад маргарин хэрэглэдэг хүмүүс энгийн хүмүүсээс 6%-аар илүү нас барж байсан гэнэ. Тиймээс маргарин хэрэглэхийн оронд эмч оливын тос хэрэглэхийг зөвлөдөг байна. “Цөцгийн тосноос өөр ямар ч тос тухайн хоолонд тохирохгүй мэт санагдсан ч оливын тосыг, цөцгийн тосын хамт хэрэглэх нь эрүүл мэндэд хор багатай” гэж эмч хэлжээ.
8. Гахайн махан хиам
Тафтсын Эрүүл Мэндийн төвийн зүрх судасны тасгийн эрхлэгч Жеймс Удельсоны үзэж байгаагаар “гахайн махан хиам нь давсны агууламж ихтэй байдаг учир зүрх судасны өвчлөлд хүргэх өндөр магадлалтай байдаг” гэнэ. Жеймс өөрийн өвчтөнүүдэд үргэлж ногоо, үр тариа, загас, өөхгүй мах, самар, шош идэхийг зөвлөдөг байна.
