Монгол Улсын Ерөнхийлөгч Ухнаагийн Хүрэлсүхийн урилгаар Бүгд Найрамдах Австри Улсын Ерөнхийлөгч Александр Ван дер Беллен гэргий Дорис Шмидауэрийн хамт Монгол Улсад төрийн айлчлал хийж байна.
Уг айлчлалын хүрээнд Монгол-Австрийн Бизнес форумыг өнөөдөр (2025.05.27) зохион байгуулагдлаа.
Монгол, Австри хоёр улсын хооронд дипломат харилцаа тогтоосны 60 жилийн ойн хүрээнд зохион байгуулагдаж буй энэхүү бизнес форумд Монгол Улсын Ерөнхийлөгч Ухнаагийн Хүрэлсүх, Австрийн Холбооны Улсын Ерөнхийлөгч Александр Ван дер Беллен нар оролцлоо.
Мөн Бизнес форумд хоёр улсаас хүнс, хөдөө аж ахуй, хөнгөн үйлдвэр, худалдаа үйлчилгээ, уул уурхай, ашигт малмал, барилга, эрчим хүч, боловсрол, эрүүл мэнд зэрэг 20 орчим салбарын 100 гаруй аж ахуйн нэгжийн нийт 200 гаруй төлөөлөл оролцов.
Талууд “Хүнсний хангамж, аюулгүй байдал”, “Цагаан алт” үндэсний хөдөлгөөний хүрээнд Монгол Улсын дотоодын үйлдвэрлэлийг хөгжүүлэх, эрчимжсэн мал аж ахуйг дэмжих, дэвшилтэт техник, технологи нэвтрүүлэх чиглэлээр хамтарсан төсөл, хөтөлбөр хэрэгжүүлэх талаар санал солилцлоо.
Австри Улсын ойн засаглал, уур амьсгалд тэсвэртэй ой мод тарих, ойн менежментийн туршлагад тулгуурлан усны нөөцийг хамгаалах, ойн хомсдол, цөлжилттэй тэмцэх зэрэг чиглэлээр хамтын ажиллагааг өргөжүүлэхээр тохиролцлоо.
Мөн хүнс, хөдөө аж ахуйн салбарын бизнесийн төлөөллийг тус орны бизнес эрхлэгчидтэй түншлэх, гэрээ хэлэлцээр байгуулах, бизнесийн шинэ боломжийг нээсэн үр дүнтэй бизнес форум болж өндөрлөлөө.
