Монгол Улсын Ерөнхийлөгч У.Хүрэлсүхийн Үйлдвэр, үйлчилгээний бодлогын зөвлөх Ч.Даваабаяр Үндэсний статистикийн хорооны дарга Б.Батдаваатай “Хүнсний хангамж, аюулгүй байдлыг хангах талаар авах зарим арга хэмжээний тухай” УИХ-ын тогтоолыг хэрэгжүүлэх ажлын төлөвлөгөөг танилцуулах уулзалтыг хийж, санал солилцлоо.
Уулзалтад Үндэсний статистикийн хорооны Нэгдсэн статистикийн газрын дарга Э.Эрдэнэсан, Хөдөө аж ахуй, байгаль орчин, үйлдвэрлэлийн статистикийн хэлтсийн дарга Э.Мягмарханд нар оролцлоо.
Уулзалтын эхэнд Монгол Улсын Ерөнхийлөгчийн Тамгын газрын Хүнсний төсөл, хөтөлбөр хариуцсан албаны ахлах референт Д.Цэвээндорж, референт О.Дамдиндулам нар “Хүнсний хангамж, аюулгүй байдал” хөдөлгөөний хүрээнд гарсан Hunsniihuvisgal.mn сайтын танилцуулга болон “Хүнсний хангамж, аюулгүй байдлыг хангах талаар авах зарим арга хэмжээний тухай” тогтоолыг хэрэгжүүлэх арга хэмжээний төлөвлөгөөнд буй Үндэсний статистикийн хороонд хамаарах ажлыг танилцууллаа.
“Хүнсний хангамж, аюулгүй байдлын талаар авах зарим арга хэмжээний тухай” 5 хэсэг, 49 заалт бүхий тогтоолд Хүнс, хөдөө аж ахуй, хөнгөн үйлдвэрийн салбарын эрх зүйн орчныг сайжруулах чиглэлээр Хүнсний аюулгүй байдлын статистик үзүүлэлтийг тооцох аргачлалыг шинэчлэн боловсруулж батлуулах, хүнсний чиглэлийн бүх стандартад дүн шинжилгээ, үнэлгээ хийж, шаардлагатай стандарт, техникийн зохицуулалт, хүнсний сүлжээний үе шат бүрд зохистой дадлын зөвлөмж, зааврыг шинэчилж, шинээр батлах гэсэн заалтыг тусгасан. Уг ажлыг Үндэсний статистикийн хороо, Хүнс, хөдөө аж ахуй, хөнгөн үйлдвэрийн яамтай хамтран хэрэгжүүлнэ.
Энэ хүрээнд Үндэсний статистикийн хорооноос хэд хэдэн ажлыг хийж эхлээд байгааг ҮСХ-ны дарга Б.Батдаваа онцоллоо. Тухайлбал: Мал аж ахуйн гаралтай түүхий эд түүн дотор сүү, мах, арьс шир зэрэг түүхий эд бүтээгдэхүүний ашиг шимийн судалгааны давтамжийг богиносгож, үйлдвэрлэлийн нэмүү өртөг рүү хэчнээн хэмжээгээр орж байгааг судлах, хүнсний бүтээгдэхүүний мал аж ахуйгаас гарч байгаа циклийг эхнээс нь төгсгөл хүртэл бүрэн нарийвчлалтай хэмждэг болох статистик мэдээллийг сайжруулах ажлыг эхлүүлжээ. Мөн газар тариалангийн бүтээгдэхүүний тариалалт гарцыг шинэ технологи ашиглан хэмжих ажлыг зохион байгуулахаар болжээ. Тодруулбал: Сансрын зураг ашиглан Монгол улсын хэмжээнд тариалсан хүнсний ногооны гарцыг хэмжиж статистик бүтээгдэхүүний үйлдвэрлэл болохоор зорьж байгаа юм байна.
