Монгол Улсын Ерөнхийлөгч Ухнаагийн Хүрэлсүхийн санаачилгаар орон даяар өрнөөд буй “Хүнсний хангамж, аюулгүй байдал” үндэсний хөдөлгөөнд баялаг бүтээгч “Цайдам трейд” компани нэгдлээ. Тус компани нь Buramhan брэндээрээ олны танил болсон манай улсын амттан үйлдвэрлэгч үндэсний үйлдвэрүүдийн нэг юм.
“Цайдам трейд” компани нь 2007 онд байгуулагдсан бөгөөд 2016 оны хоёр дугаар хагасаас эхлэн гараар урласан хатуу чихрийг Монголын зах зээлд нийлүүлэх төслийн судалгааны ажлыг эхлүүлжээ.
Улмаар бүтээгдэхүүнүүдээ 2017 оны 6-р сараас эхлэн гурван төрлийн шилэн савлагаа, 10 төрлийн иштэй чихэр 5 төрлийн уутан савлагаатайгаар өнөөдрийг хүртэл нийт 17 компанийн 300 орчим худалдааны цэг, гэрээт борлуулагчид болон Бурамхан нэрийн бүтээгдэхүүний 4 салбараар дамжуулан зах зээлд тасралтгүй нийлүүлсээр байна. Бурамхан үйлдвэр нь нийт 30 гаруй хүнийг ажлын байраар хангаж, хоногт 1 тн чихэр үйлдвэрлэх хүчин чадалтайгаар ажиллаж байгаа баялаг бүтээгч юм.
Чихрээ гар аргаар болон үйлдвэрийн гэсэн 2 төрлөөр хийдэг. Чихэртээ байгалийн гаралтай амт өнгийг оруулж, витамин С-ээр баяжуулан хамгийн чанартай бүтээгдэхүүн хийж байгаа нь тус үйлдвэрийн давуу тал.
Хүнсний хангамж, аюулгүй байдалдаа онцгой анхаарах шаардлагатай болсон энэ цаг үед элдэв химийн бодисгүй, цардуулггүй, эрүүл мэндийн хор нөлөөгүй бүтээгдэхүүн хэрэглэх нь чухал юм. Бурамхан үйлдвэр нь цардуулгүй, хадгалалтын уртасгагч тогтворжуулагч химийн бодисгүй, дээд зэргийн чанартай түүхий эд ашиглаж дотоодын амттан үйлдвэрлэлд хувь нэмрээ оруулж байна.
