Монгол Улсын Ерөнхийлөгч Ухнаагийн Хүрэлсүхийн санаачилгаар хэрэгжиж буй “Хүнсний хангамж, аюулгүй байдал” үндэсний хөдөлгөөний орон нутаг дахь хэрэгжилтийг эрчимжүүлэх, иргэдийн оролцоог идэвхжүүлэх зорилгоор Төвийн бүсийн аймгуудад тус хөдөлгөөний нээлтийн арга хэмжээг зохион байгуулж байна.
Өнөөдөр /2022.10.15/ Сэлэнгэ аймагт “Хүнсний хангамж, аюулгүй байдал” үндэсний хөдөлгөөний нээлтийн арга хэмжээ боллоо.
Тус үйл ажиллагааг Монгол Улсын Ерөнхийлөгчийн Тамгын газар, Хүнс, хөдөө аж ахуй, хөнгөн үйлдвэрийн яам, Сэлэнгэ аймгийн Засаг даргын Тамгын газар, Сэлэнгэ аймгийн Хүнс хөдөө, аж ахуйн газар, сумдын Засаг даргын тамгын газартай хамтран зохион байгууллаа.
Аймгийн Иргэдийн Төлөөлөгчдийн Хурал, Засаг даргын Тамгын газар, сумдын Засаг дарга болон аж ахуй нэгжийн төлөөлөл, иргэдэд үндэсний хөдөлгөөний зорилго, хүлээгдэж буй үр дүн, хэрэгжүүлэх арга хэмжээг танилцуулж, УИХ-аас баталсан “Хүнсний хангамж, аюулгүй байдлыг хангах талаар авах зарим арга хэмжээний тухай” 36-р тогтоолын хэрэгжүүлэх арга зам, иргэдийн оролцоо, санал, сэтгэгдлийг сонсож, хэлэлцүүлэг өрнүүллээ.
Нээлтийн арга хэмжээний үеэр Ерөнхийлөгчийн Үйлдвэр, үйлчилгээний бодлогын зөвлөх Ч.Даваабаяр Монгол Улсын Ерөнхийлөгч Ухнаагийн Хүрэлсүхийн “Хүнсний хангамж, аюулгүй байдал” үндэсний хөдөлгөөнд оролцогчдод дэвшүүлсэн мэндчилгээг уншиж танилцууллаа. ЕТГ-ын Хүнсний төсөл хөтөлбөр хариуцсан мэргэжилтэн А.Амаржаргал “УИХ-ын 36-р тогтоолын хэрэгжилт ба Ерөнхийлөгчийн тамгын газрын Хүнсний төсөл, хөтөлбөрийн албаны хийж хэрэгжүүлж буй ажлууд”-ын талаар, ХХААХҮЯ-ны Газар тариалангийн бодлогын хэрэгжилтийг зохицуулах газрын дарга Д.Есөн-Эрдэнэ “МУ-ын Хүнсний хангамж, аюулгүй байдал, цаашид авах арга хэмжээ”-ны талаар, Эдийн засгийн хөгжлийн яамны Бүс нутаг, аж үйлдвэрийн бодлогын газрын дарга Д.Эрдэнэбаяр “Хүнсний хангамж, нийлүүлэлтийн тогтолцоо” сэдвээр, Зээлийн батлан даалтын сангийн Батлан даалтын газрын дарга А.Амаржаргал “Зээлийн батлан даалтын сангийн бүтээгдэхүүн үйлчилгээний танилцуулга”-ын талаар дэлгэрэнгүй мэдээлэл өгөв.
Сэлэнгэ аймаг Монгол Улсын Үндэсний аюулгүй байдал, тэр дундаа хүнсний аюулгүй байдлыг сахин хамгаалагч, хөдөө аж ахуйн бүтээгдэхүүний гол нийлүүлэгч гэдгээрээ бусад аймгаас онцлогтой. Сэлэнгэчүүдийн хөдөлмөрөөр бий болсон эх орны “Орхон” сортын улаан буудай, Шаамарын алим, нарийн нарийвтар ноост “Орхон”, “Хангай”, “Ерөө” үүлдрийн хонь, махны “Сэлэнгэ” үүлдрийн үхэр зэрэг нь энэ нутгийнхны бахархал.
Газар тариалан
Сэлэнгэ аймаг нь 41.1 мян.км2 газар нутагтай, 305.5 мян.га тариалангийн эргэлтийн талбайтай. Аймгийн хэмжээнд нийт газар нутгийн 50.0 хувь нь хөдөө аж ахуйн эдэлбэр газар. Үүнээс
- 15.3% үр тариа,
- 0.3% төмс, хүнсний ногоо,
- 0.01% жимс, жимсгэнэ,
- 78.4% бэлчээр,
- 6% хадлангийн талбай,
- 0.2 %-ийг хөдөө аж ахуйн барилга байгууламж эзэлж байна.
Улсын хэрэгцээт үр тарианы 50%, төмсний 28%, хүнсний ногооны 30%-ийг дангаараа үйлдвэрлэдэг. Өнөөдөр хүнсний аюулгүй байдал нийтийн анхаарлын төвд байгаа энэ цаг үед Сэлэнгийн цэвэр хөрсөнд ургасан бүхий л тариа будаа, ногоо, жимс экологийн цэвэр, химийн бордоо бодис агуулаагүй баталгаатай хүнс гэдгээрээ давуу.
Аймгийн хэмжээнд өнөөдөр үр тарианы 304 аж ахуй нэгж газар тариалангийн ажил эрхэлж байна.
Хүнс, жижиг дунд үйлдвэр
Аймгийн хэмжээнд нийт 1392 жижиг дунд үйлдвэр, цехэд 8275 иргэн ажиллаж байна. Үүний 60 гаруй хувь нь газар тариалан, мал аж ахуйн үйлдвэрлэл эрхлэгч, хүнсний үйлдвэрлэл, мод модон бүтээгдэхүүн, барилгын материал, оёмол бүтээгдэхүүний үйлдвэрлэл эрхлэгчид байна.
Үүнээс мах махан бүтээгдэхүүний–17, Гурил-1, гурилан бүтээгдэхүүний-42, Сүүн бүтээгдэхүүний -11, Нөөшилсөн бүтээгдэхүүний-1, Цайны үйлдвэрлэл -1, Ургамлын тос -1, Согтууруулах ундааны үйлдвэрлэл -1, Баяжуулсан бүтээгдэхүүний үйлдвэрлэл -1, бялууны цех-5, ус савлах цех-5, амтлагчны цех-2, нийт 93 үйлдвэр, цех үйл ажиллагаа явуулж байна.
Хүн амын хүнсний хэрэгцээт мах, сүү, гурил, төмс, хүнсний ногоог 100 хувь, өндөг, ургамлын тос, гурилан, сүүн бүтээгдэхүүн, жимс, жимсгэнэ, буурцагт ургамлыг 3-27 хувийг дотооддоо үйлдвэрлэж, махны 49,4 хувийг, сүүний 11 хувийг үйлдвэрийн аргаар боловсруулж байна.
