Монгол Улсын Ерөнхийлөгч Ухнаагийн Хүрэлсүхийн санаачилгаар орон даяар хэрэгжиж буй “Хүнсний хангамж, аюулгүй байдал” үндэсний хөдөлгөөний хүрээнд УИХ-аас 36-р тогтоолыг батлан гаргасан. Энэ хүрээнд 20 гаруй төрийн байгууллагууд уялдаа холбоотой, хамтарч ажиллахаа илэрхийлж байгаа бөгөөд нутгийн захиргааны байгууллагууд, олон улсын байгууллага, хувийн хэвшил, үйлдвэрлэгчид нэгдэж эхэллээ.
Монгол Улсын Ерөнхийлөгчийн зөвлөх болон Ерөнхийлөгчийн Тамгын газрын Хүнсний төсөл, хөтөлбөр хариуцсан ажлын албаны төлөөлөгчид 36-р тогтоолын хүрээнд хэрэгжүүлэх арга хэмжээнүүдийг хамтран хэрэгжүүлэх үүрэгтэй орон нутгийн засаг захиргааны нэгжүүдэд танилцуулж байна. Нэг сарын хугацаанд нийт 27 төрийн байгууллага, 10 гаруй үйлдвэрлэгч, баялаг бүтээгч, 8 олон улсын байгууллагатай уулзалт зохион байгуулаад байна.
Өнөөдөр Дархан-Уул аймгийн удирдлагуудтай уулзаж, 36-р тогтоолын бодлого, хэрэгжүүлэх арга хэмжээнүүдийн талаар ярилцаж, санал солилцлоо.
Уулзалтад Дархан-Уул аймгийн Засаг даргын тамгын газрыг төлөөлөн:
- Дархан-Уул аймгийн Засаг дарга Б.Азжаргал,
- Дархан-Уул аймгийн ИТХ-ын дарга С.Насанбат
- Дархан-Уул аймгийн Хүнс, хөдөө аж ахуйн газрын дарга Т.Ганболд
Хүнсний төсөл, хөтөлбөр хариуцсан албыг төлөөлөн:
- Монгол Улсын Ерөнхийлөгчийн Үйлдвэр, үйлчилгээний бодлогын зөвлөх Ч.Даваабаяр,
- Эдийн засгийн хөгжлийн яамны Бүс нутаг, аж үйлдвэрийн бодлогын газрын дарга Д.Эрдэнэбаяр нар оролцлоо.
Дархан-Уул аймгийн хувьд “Хүнсний хангамж, аюулгүй байдал” үндэсний хөдөлгөөний хэрэгжилтийн хүрээнд тус аймгийн зүгээс 4 чиглэлийн 34 арга хэмжээг хэрэгжүүлэхээр төлөвлөжээ.
