Монгол Улсын Ерөнхийлөгч Ухнаагийн Хүрэлсүх “Хүнсний хангамж, аюулгүй байдал” үндэсний хөдөлгөөний хүрээнд баялаг бүтээгчдийн төлөөлөл, үндэсний үйлдвэрлэгч “Үлэмж Органик” компанийн үйл ажиллагаатай танилцлаа
Үндэсний үйлдвэрлэгч “Үлэмж Органик” компани нь сүү, сүүн бүтээгдэхүүн үйлдвэрлэл, худалдааны чиглэлээр 12 дахь жилдээ тасралтгүй үйл ажиллагаа явуулж байна.
Тус компани нь үйлдвэрлэлдээ Монгол орны байгалийн бэлчээр мөн химийн хор, бордоо хэрэглээгүй тариалангийн талбайд тарьж бэлтгэсэн тэжээлээр тэжээсэн, эрүүл мэндийн үзлэгт хамрагдаж шинжилгээ хийгдсэн эрүүл малаас, цэвэр орчинд зориулалтын цахилгаан саалтуураар сааж бэлтгэн газар дээрээ 4 градус хүртэл хөргөж технологийн горимын дагуу үйлдвэрлэсэн үнээний цэвэр ОРГАНИК ШИНГЭН сүүг ашиглаж бүтээгдэхүүнээ хэрэглэгчиддээ хүргэдэг давуу талтай юм.
“Үлэмж органик” ХХК 11 нэр төрлийн 30 шилэн савлагаатай бүтээгдэхүүн үйлдвэрлэн зах зээлд нийлүүлж байна. “Монтаримал” ХХК-ийн ферм нь жилд 370 гаруй тн сүү, 7 тн мах үйлдвэрлэдэг. Мөн 310 га талбайд тэжээлийн манжин, овъёoс, вандуй, арвай зэрэг тэжээлийн ургамал тариалж, жилд 700 тн дарш, 550 тн ногоон тэжээл, 100 тн байгалийн хадлан бэлтгэдэг байна.
Улаан буудайн болон сүүний урамшуулал өгч байгаа нь энэ чиглэлээр үйл ажиллагаа явуулдаг аж ахуйн нэгжүүдэд томоохон дэмжлэг болж байгааг “Үлэмж органик” ХХК-ийн Гүйцэтгэх захирал Б.Далайжаргал хэллээ.
“Хүнсний хангамж, аюулгүй байдал” үндэсний хөдөлгөөний хүрээнд дотоодын аж ахуйн нэгжүүд үйлдвэрлэлээ өргөтгөх, шинэ техник, технологи нэвтрүүлэх боломж бүрдэж байгааг хэлэв.
Цаашид малын тэжээл, бордоог НӨАТ-аас чөлөөлөх, хуурай сүүний импортыг бууруулах, хөрөнгө, санхүүгийн дэмжлэг үзүүлбэл аж ахуйн нэгжүүд ирэх таван жилд 19 нэр төрлийн хүнсний бүтээгдэхүүнээр дотоодын хэрэгцээгээ хангаж чадна гэж үздэгээ Ерөнхийлөгчид танилцуулав.
Үлэмж Органик компани өнөөдрийн байдлаар 11 гаруй нэр төрлийн бүтээгдэхүүн үйлдвэрлэж эх орныхоо сүү сүүн бүтээгдэхүүний хэрэгцээг хангахад хувь нэмрээ оруулж байна.
