Монгол Улсын Ерөнхийлөгч Ухнаагийн Хүрэлсүх “Хүнсний хангамж, аюулгүй байдал” үндэсний хөдөлгөөний хүрээнд “Баялаг фийд” тэжээлийн үйлдвэрийн үйл ажиллагаатай танилцлаа.

“Баялаг фийд” тэжээлийн үйлдвэр нь улс эх орныхоо өнцөг булан бүрт байгаа эрчимжсэн аж ахуйд хэрэгцээ шаардлагыг бүрэн хангахуйц амин дэм, уураг, витаминаар баялаг, таван хошуу мал болон туслах аж ахуйн эрүүл аюулгүй байдлын чанарын өндөр түвшний тэжээл, тэжээлийн бүтээгдэхүүнийг олон төрлөөр үйлдвэрлэн нийлүүлж байгаа үндэсний үйлдвэрлэгч юм.

“Баялаг фийд” ХХК 2018 оноос эрчимжсэн аж ахуйн нэгжүүдэд уураг, амин дэм, витаминаар баялаг бүтээгдэхүүн нийлүүлж байна.

Үйлдвэр нь өдөрт 240 тн, сард 5,000 тн бүрэн найрлагат тэжээл үйлдвэрлэх хүчин чадалтай. Өндөглөгч шувууны 50 гаруй аж ахуйн нэгж, 300 гаруй иргэнд сар бүр 600 тн өндөглөгч шувууны тэжээл борлуулдаг. Мөн махны шувуу, гахай, адуу, үхэр, хонины аж ахуйнуудад тэжээлээ нийлүүлдэг байна.

Дотоодын аж ахуйн нэгжүүд шувууны тэжээлийн зах зээлийг 100 хувь хангадаг юм байна.

Тус үйлдвэр нь адуунд зориулсан импортын өндөр үнэтэй тэжээлийг орлох, чанар стандартын ижил түвшинд хүрсэн “Шандас брэнд”-ийн цэвэр азарга, гүүний тэжээл, цэвэрлэж бутлан, эрдэс давс хужир нэмэлтээр баяжуулсан “Баялаг овъёос”, сүүний үнээнд зориулсан уургаар баялаг “Баялаг шим” тэжээл, “Тамир” хорголжин тэжээл, “Урх цагаан” хурганы тэжээл, мөн тахианы тэжээлийг үйлдвэрлэж мал аж ахуйн салбарт хувь нэмрээ оруулж байна.

Монголын мал аж ахуйн салбар ирээдүйд хөгжих ёстой салбар. Монгол Улс цаашдаа мал аж ахуй /МАА/-н салбараа илүү хөрвөх чадвар сайтай, эдийн засгийн хувьд хүчтэй болгохын тулд бэлчээрийн мал аж ахуйд онцгой анхаарах шаардлагатай. Мөн малын тэжээлийн асуудал. Өөрөөр хэлбэл бэлчээр тэжээл үгүйгээр мал аж ахуй байхгүй, мал аж ахуйгүйгээр бусад нь байхгүй.