УИХ-ын чуулганы 11 сарын 18-ны үдээс хойшхи хуралдаанаар Намрын ургац хураалт болон өвөлжилтийн бэлтгэл хангах чиглэлээр авч хэрэгжүүлж байгаа арга хэмжээний талаарх ХХААХҮ-ийн сайд Х.Болорчулууны мэдээллийг сонслоо.
Мэдээллийн эхэнд салбарын сайд ургац хураалтын чиглэлээр авч хэрэгжүүлсэн ажлын талаар товч мэдээлэл хийв. Тэрбээр “Энэ онд улсын хэмжээнд үр тариа, төмс, хүнсний ногоо, малын тэжээл, тосны ургамал, жимс жимсгэнийг нийт 567 мянган га-д тариалсан ба ургац хураалтын ерөнхий дүнгээр өнгөрсөн жилтэй харьцуулахад төмс, хүнсний ногоог тус бүр 15 хувиар нэмэгдүүлэн хураасан. Ургац хураалтын хүрээнд иргэд, аж ахуй нэгжүүдэд зээл урамшууллыг олгосон ба 18 анги нэгтгэлийн алба хаагч, таван их дээд сургуулийн оюутан ургац хураалтад оролцлоо. “Намрын ногоон өдрүүд” арга хэмжээг нийслэл болон аймгийн төвүүдэд зохион байгуулж, төмс, хүнсний ногооны борлуулалтыг нэмэгдүүлсэн.
2022-2023 оны өвөлжилт, хаваржилтын бэлтгэл ажлыг хангах Засгийн газрын 277 дугаар тогтоол, Ерөнхий сайдын 09 дүгээр албан даалгаврыг орон нутагт хүргүүлж, Засаг дарга нар хэрэгжилтийг нь хангаж ажилласан. Улсын хэмжээнд 188 мянган малчин өрхөд 70 гаруй сая толгой буюу хонин толгойд шилжүүлсэнээр 122.5 сая толгой мал өвөлжихөөс 10 гаруй саяыг нь эдийн засгийн эргэлтэд оруулна.
Хүнсний аюулгүй байдлын үндэсний зөвлөлөөс гаргасан зөвлөмжийн дагуу тодорхой тооны үхэр, адуу, хонь, ямааны махыг хүнсэнд экспортлох ба тодруулбал, Хятад улс руу дулааны аргаар боловсруулсан мах махан бүтээгдэхүүн, баруун аймгуудаас Казахстан, Иран улс руу адууны махны экспортыг хийж байна. Хот суурин газрын нөөцийн мах бэлтгэлд зориулж 4 аж ахуй нэгжид 46 тэрбум төгрөгийн зээл олгосон. Түүнчлэн аймгууд мах нөөцлөхөд зориулж 1,1 тэрбум төгрөг төсөвлөсөн.
Отроор өвөлжих малчин, мал сүрэгт шаардлагатай бэлтгэлийг хангаж, малчдын гар дээр болон нөөцөд тэжээл, гар тэжээл, дарш, хужир шүүг зохих түвшинд базааж, хашаа саравч, худаг ус, тарилга, туулга, тандалт шинжилгээний асуудлыг шийдвэрлэсэн. Малын гоц халдварт шүлхий, үхрийн арьс товруутах өвчин болон цэцэг өвчин аравдугаар сарын 10-наас хойш бүртгэгдээгүй. Өнөөдрийн байдлаар баруун болон говийн зарим аймаг зудын өндөр эрсдэлтэйд тооцогдож байна. Нийт 11 аймгийн 82 сум өндөр эрсдэлтэй, мөн 80 гаруй сум дунд эрсдэлтэй түвшинд байна. Иймд отрын маргаан гаргахгүй байх, шатахууны нөөцийг хангах, цаг агаарын мэдээг тогтвортой өгөх, цаашид эрчимжсэн мал аж ахуй, усалгаат тариаланг хөгжүүлэхэд анхаарч, эдийн засгийн тогтвортой орчныг бүрдүүлэх шаардлагатай” гэв.
АН-ын бүлгийн дарга О.Цогтгэрэл цөөнхийг төлөөлж хэлсэн үгэндээ салбарын яам 5-10 жилийн цаадахыг төлөвлөж ярих байтал ганц өвлийг хэрхэн даван туулах вэ гэдэг дээр анхаарч ажиллаж байгааг буруушаагаад, ХАА-н салбарыг орчин үежүүлэх бодлого нэвтрүүлэх хэрэгтэй. Өөрөөр хэлбэл, бүтээмж өндөртэй, үндэсний онцлог ялгарал бүхий өвлөөс айдаггүй бизнес, аж ахуйг бий болгох шаардлагатай” гэсэн байр суурийг илэрхийллээ.