ЕТГ-ын Хүнсний төсөл, хөтөлбөрийн албанаас эрхлэн гаргадаг “Хүнсний хувьсгал” сэтгүүлийн 2 дахь дугаар хэвлэгдлээ.
Монгол Улсын Ерөнхийлөгч хүнсний хангамж, аюулгүй байдлыг хангах чиглэлээр шинжлэх ухаанд суурилсан нэгдсэн бодлогыг бүх шатанд, хамтын хүчээр хэрэгжүүлэх шаардлагатай гэж үзэж “Хүнсний хувьсгал”-ыг санаачлан, үндэсний хөдөлгөөнийг орон даяар өрнүүлээд байна. Үүний дагуу ойрын таван жилийн хугацаанд хүнсний хангамж, аюулгүй байдалдаа анхаарч, өргөн хэрэглээний 19 нэр төрлийн хүнсний бүтээгдэхүүнийг дотоодоосоо 100 хувь хангах, цаашлаад хүнс экспортлогч орон болох зорилт бүхий УИХ-ын 36 дугаар тогтоол батлагдаж, зарим ажлууд хэрэгжиж эхэлсэн.
Энэ дугаарт
- Монгол Улсын Ерөнхийлөгч У.Хүрэлсүхийн гадаад улсын албан тушаалтан, төлөөлөгчтэй уулзах үеэр хөндөж, ярьсан хүнсний аюулгүй байдалтай холбоотой асуудлууд,
- Ерөнхийлөгчийн хүнс үйлдвэрлэгчид, газар тариалан эрхлэгчид, хүнс хөдөө аж ахуйн салбарын төлөөллүүдтэй хийсэн уулзалт, зөвлөгөөнүүд,
- ХХААХҮ-ийн сайд Х.Болорчулууны “Хүнсний хувьсгал”-ыг гол хэрэгжүүлэгч салбар яамны зүгээс тус хөдөлгөөнийг хэрхэн хэрэгжүүлэхээр төлөвлөж байгаа эсэх талаар ярилцлага,
- Ерөнхийлөгчийн Үйлдвэр, үйлчилгээний бодлогын зөвлөх Ч.Даваабаяр, Ерөнхийлөгчийн Хот, хөдөөгийн хөгжлийн бодлогын зөвлөх О.Буяннэмэх, ХХААХҮЯ-ын Төрийн нарийн бичгийн дарга Т.Жамбалцэрэн нараар ахлуулсан ажлын хэсгүүдийн 21 аймгийн орон нутгийн удирдлагууд, хүнс үйлдвэрлэгчид, олон улсын байгууллагууд, баялаг бүтээгчид, малчид, тариаланчидтай хийсэн уулзалтууд,
- “Хүнсний хангамж, аюулгүй байдал” үндэсний хөдөлгөөнийг хэрэгжүүлэхэд нийслэл болон орон нутгууд ямар бодлого, зорилт тавин ажиллаж байгаа эсэх талаар зөвлөлдөн хэлэлцсэн нийслэл болон 21 аймгийн “Хүнсний хувьгал” нээлт,
- “Хүнсний хангамж, аюулгүй байдлыг хангах талаар авах зарим арга хэмжээний тухай” УИХ-аас баталсан тогтоолыг хэрэгжүүлэх ажлын хүрээнд төрийн болон орон нутгийн засаг захиргаа, олон улсын байгууллагууд бодлого, зохицуулалтын ямар арга хэмжээ авч хэрэгжүүлэхээр төлөвлөж байгаа эсэх
- Монгол улсын хүнс, хөдөө аж ахуйн салбарын өнөөгийн нөхцөл байдлын талаарх олон улсын байгууллагаас гаргасан мэдээллийг бэлтгэн хүргэж байна.
