Монгол Улсын Ерөнхийлөгчийн У.Хүрэлсүхийн зарлигаар Тулгар төрийн 2231, Их Монгол Улс байгуулагдсаны 816, Үндэсний эрх чөлөө, тусгаар тогтнолоо сэргээн мандуулсны 111 жил, Ардын хувьсгалын 100, 101 жилийн ойг тохиолдуулан Хүнс, хөдөө аж ахуй, хөнгөн үйлдвэрийн салбарт үр бүтээлтэй ажиллаж байгаа хөдөлмөр зүтгэлийг нь үнэлэн “ОБ пластик” сав баглаа боодлын үйлдвэрийн нэр бүхий ажилчдыг “Алтангадас” одон, “Хөдөлмөрийн хүндэт” медалиар шагналаа.
Төрийн дээд одон медалиар шагнагдсан нэр бүхий хүмүүст шагналыг Ерөнхийлөгчийн Тамгын газрын дарга Я.Содбаатар, Ерөнхийлөгчийн Үйлдвэр, үйлчилгээний бодлогын зөвлөх Ч.Даваабаяр нар гардуулан өглөө.
“АЛТАНГАДАС” ОДОНГООР:
- Об пластик ХХК-ийн цахилгаанчин Гаваагийн Артаг,
- Об пластик ХХК-ийн тоног төхөөрөмжийн оператор Гэндэндаржаагийн Баярсайхан,
- Об пластик ХХК-ийн үйлдвэрлэл эрхэлсэн захирал Жамцийн Содбаяр,
- Об пластик ХХК-ийн жолооч Дашдаваагийн Энхтөр,
“ХӨДӨЛМӨРИЙН ХҮНДЭТ” МЕДАЛИАР:
- Об пластик ХХК-ийн чанар шалгагч Ичинхорлоогийн Чимэгсүрэн,
- Об пластик ХХК-ийн цахилгаанчин Лханаажавын Эрдэнэцогт,
- Об пластик ХХК-ийн үйлдвэрийн ажилтан Зундуйн Алтанжаргал,
- Об пластик ХХК-ийн борлуулалтын менежер Хутрангаагийн Сүхбаатар,
- Об пластик ХХК-ийн борлуулалтын менежер Шонхорын Итгэлт нар шагнуулж энгэрээ мялайлаа.
Ерөнхийлөгчийн Үйлдвэр, үйлчилгээний бодлогын зөвлөх Ч.Даваабаяр шагнал гардуулах ёслолыг хааж хэлсэн үгэндээ: “Хүнс эрүүл бол хүн эрүүл, хүн эрүүл бол улс эх орон эрүүл байдаг. Аль ч улс оронд хүнс, хөнгөн үйлдвэрлэлийн салбар хамгийн чухал салбар байдаг. Ийм чухал салбарыг манлайлан ажиллаж байгаа нийт үйлдвэрлэгчид, баялаг бүтээгчид та бүхэнд төрдөө үнэлүүлж, энгэрээ гялалзуулж байгаад баяр хүргэе” гэв.
Анх 10 ажилтан, 5 машинтайгаар гялгар уут үйлдвэрлэх ажлаа эхэлж байсан “Об пластик” компани өдгөө 170 ажилтантай, 70 гаруй машин тоног төхөөрөмжтэй болж өргөжин, дотоодын гялгар уут, баглаа боодлын зах зээлийн 50-60 хувийг дангаараа ханган ажиллаж байна. Жижиг дунд үйлдвэрийн салбарт олон жил үр бүтээлтэй ажилласан хөдөлмөр зүтгэлийг минь өндрөөр үнэлж төрийн дээд одон медаль өгч байгаа нь илүү ихийг хийж бүтээх урам зориг болж байна. Цаашид төрийн тэргүүний санаачилсан “Хүнсний хангамж, аюулгүй байдал” үндэсний хөдөлгөөнд манлайлан оролцож, эрүүл ахуйн шаардлагад нийцсэн гялгар уут, сав баглаа боодлыг үйлдвэрлэгч гэдгээ бататган, хүн амынхаа хүнсний аюулгүй байдлыг сахин ажиллахаа “ОБ пластик” компанийн хамт олны зүгээс илэрхийллээ.
