Монгол Улсын Ерөнхийлөгчийн У.Хүрэлсүхийн зарлигаар Тулгар төрийн 2231, Их Монгол Улс байгуулагдсаны 816, Үндэсний эрх чөлөө, тусгаар тогтнолоо сэргээн мандуулсны 111 жил, Ардын хувьсгалын 100, 101 жилийн ойг тохиолдуулан Хүнс, хөдөө аж ахуй, хөнгөн үйлдвэрийн салбарт үр бүтээлтэй ажиллаж байгаа хүмүүсийг төрийн дээд одон медалиар шагналаа.
Тухайлбал Монгол улсын стратегийн чухал хүнс үйлдвэрлэхэд онцгой хувь нэмрээ оруулж, олон жил үр бүтээлтэй ажилласан “Хангай миллс” компани болон үндэсний үйлдвэрлэгч “Хангай” ХХК, “Хаалга цонх” компанийн нэр бүхий хүмүүсийг шагналаа.
“АЛТАНГАДАС” ОДОНГООР:
- “Хангай миллс” компанийн ажилтан Д.Долгор,
- “Хаалга цонх” ХХК-ийн ерөнхий инженер Шаравын Барсбаатар
“ХӨДӨЛМӨРИЙН ХҮНДЭТ” МЕДАЛИАР:
- “Хангай миллс” компанийн гүйцэтгэх захирал Г.Батболд,
- “Хаалга цонх” ХХК-ийн менежер Нэргүйн Баярсайхан
- “Хангай” ХХК-ийн мужаан Цэдэндоржийн Батсайхан,
- “Хангай” ХХК-ийн мужаан Сумъяасүрэнгийн Бямбасүрэн нар шагнууллаа.
Шагналыг Ерөнхийлөгчийн Үйлдвэр, үйлчилгээний бодлогын зөвлөх Ч.Даваабаяр гардуулан өглөө.
Ерөнхийлөгчийн Үйлдвэр, үйлчилгээний бодлогын зөвлөх Ч.Даваабаяр шагнал гардуулах ёслолыг хааж хэлсэн үгэндээ: “Хүнсний салбарынхан онцгой. Бусад хүн амарч байхад ч, шөнө унтаж байхад ч, баяр ёслолоор баярлаж байхад ч, аялж зугаалж байхад ч ажиллаж л байдаг. Зөвхөн хүнсээр хангаад зогсохгүй цаг үргэлж хүн амын эрүүл мэндийн манаанд зогсож байдаг ачтанууд. Манай улс гол 19 нэр төрлийн хүнсний бүтээгдэхүүнээр дотоодын хэрэгцээгээ бүрэн хангах, цаашлаад экспортлогч улс болоход эдгээр хүмүүсийн идэвх оролцоо чухал. Иймд төрийн тэргүүн уг салбарт ажиллаж буй хүмүүсийг өндрөөр үнэлэх шаардлагатай хэмээн үзэж шинэ оны босгон дээр төрийн дээд одон медалиар шагнаж буй Хүнсний салбар ямар чухал болохыг үлгэрлэн харууллаа.” гэв.
