Монгол Улсын Ерөнхийлөгч У.Хүрэлсүх хүнсний гол нэрийн 19 төрлийн бүтээгдэхүүнээр хүн амын хүнсний хэрэгцээг дотоодоосоо бүрэн хангаж, цаашлаад элсэн чихэр, төрөл бүрийн будаа, гахайн мах, жимс, жимсгэнээр өөрийгөө хангах, улмаар хүнс экспортлогч улс болох зорилтыг дэвшүүлж, “Хүнсний хангамж, аюулгүй байдал” үндэсний хөдөлгөөнийг санаачлан эхлүүлсэн. Энэ хүрээнд ЕТГ-ын Хүнсний төсөл, хөтөлбөр хариуцсан албанаас хүнс үйлдвэрлэлийн салбарын төлөөллүүдтэй уулзаж, санал солилцох уулзалтуудыг зохион байгуулсаар байна.
Өнөөдөр /2023.01.09/ Ерөнхийлөгчийн Ахлах зөвлөх С.Лүндэг, Ерөнхийлөгчийн Үйлдвэр, үйлчилгээний бодлогын зөвлөх Ч.Даваабаяр нар Төв аймгийн Засаг даргын орлогч Г.Сурмаа, ОХУ-ын “Сибагро” компанийн төслийн удирдагч В.А.Павлов, Л.Д.Турбянов нарыг хүлээн авч уулзлаа.
Уулзалтаар “Хүнсний хангамж, аюулгүй байдал” үндэсний хөдөлгөөний хүрээнд мах махан бүтээгдэхүүний үйлдвэрлэл, хөдөө аж ахуйн үйлдвэрлэлийн хүрээнд хийгдэж буй төслүүдийг хамтран хэрэгжүүлэх, орон нутаг дахь хүнс үйлдвэрлэлийг нэмэгдүүлэх, Монголд гахайн мах боловсруулах зэрэг асуудлаар санал солилцлоо.
“Сибагро” группийн “Тюменскийн” гахайн үржүүлгийн ферм нь газар нутгийн хамгийн эрсдэлгүй бүсэд байрладаг бөгөөд, Олон улсын стандартын дагуу 5 үеийн туршид гахайн үүлдрийн цэвэр байдлыг сайтар хянаж, генийн өөрчлөлтгүй гахайн махыг үйлдвэрлэн дотоодын болон гадаадын зах зээлд нийлүүлдэг. Тус компани нь олон улсын HACCP стандарт хангасан мах боловсруулах үйлдвэрийг Төв аймагт бий болгох зорилгоор “Сибагро” гахайн мах боловсруулах төслөө эхлүүлжээ.
Үйлвэрийн хүчин чадал нь:
- Нийт 1000-5000га тэжээлийн үйлдвэрлэлийн зориулалттай газар,
- 10 га талбай үйлдвэрийн байр,
- нэг дор 50 мянган толгой малын байр /гахай/,
- хоногт 600 толгой мал нядлах, жилдээ 18 мянган тонн мах үйлдвэрлэх юм.
Уг мах боловсруулах үйлдвэр ашиглалтанд орсноор 400 ажлын байр бий болох юм.
