Эх орондоо хүнсний хувьсгал хийх зорилготой “Хүнсний хангамж, аюулгүй байдал” үндэсний хөдөлгөөний хүрээнд Ерөнхийлөгчийн Үйлдвэр, үйлчилгээний бодлогын зөвлөх Ч.Даваабаяр 25 жилийн түүхтэй “Тэнгэрийн хишиг” компанийн үйл ажиллагаатай танилцаж, санал хүсэлтийг нь сонслоо.
Тэнгэрийн Хишиг ХХК нь 1998 оноос хойш бялуу, бялуун бүтээгдэхүүн, талх, нарийн боовны үйлдвэрлэл, бэйкерийн үйлчилгээ, органик хүнсний бүтээгдэхүүний импорт, худалдааны салбарт үйл ажиллагаагаа явуулж эхэлсэн.
Тус хамт олон хүн амын үндсэн хэрэглээ болсон талх, гурилан бүтээгдэхүүнийг дотоодын зах зээл дээрээс нийлүүлэгдэх боломжтой түүхий эд материалыг гадны шилдэг импортын бүтээгдэхүүнтэй хослуулан уламжлалт технологийг орчин үеийн дэвшилтэт технологитой хослуулан дотооддоо нэмүү өртөг шингэсэн хүнсний бүтээгдэхүүнийг үйлдвэрлэж байна. Өнөөдрийн байдлаар 50 орчим нэрийн бялуу, 70 гаруй нэрийн бэйкерийн бүтээгдэхүүн, 30 нэр төрлийн нарийн боов, 4 нэрийн талх үйлдвэрлэн харилцагч байгууллагуудаар дамжуулан хэрэглэгчдэд хүргэж байна. Нийт 130 хүнийг ажлын байраар хангаж, 21 аймаг , Улаанбаатар хотын 8 нэрийн дэлгүүр 500 гаруй харилцагчаар дамжуулан бүтээгдэхүүнээ борлуулдаг.
Ерөнхийлөгчийн Үйлдвэр, үйлчилгээний бодлогын зөвлөх Ч.Даваабаяр:
Дэлхийн Хүнсний Хөтөлбөрөөс дэлхий дээр 4 хүн тутмын нэг нь өлсгөлөн байдаг харин 5 хүн тутмын нэг нь шим тэжээлийн дутагдалтай гэх өвөрмөц дүгнэлт гаргасан нь хүнсний асуудал хүн төрлөхтний өмнө хэдийн тулгаараад буйг харуулж байна. Мөн ил болон далд гэсэн хоёр төрлийн өлсгөлөн байдаг бөгөөд Монголчуудыг далд өлсгөлөнд нэрвэгдсэн гэж мэргэжилтнүүд үздэг. Иймд монголчууд бид хүнсний аюулгүй байдал, хангамжиндаа анхаарахгүй л бол хожим илүү сөрөг үр дагавар гарна. Энэ цаг үед Монгол Улсын Ерөнхийлөгч У.Хүрэлсүхийн санаачилсан “Хүнсний хангамж, аюулгүй байдал” үндэсний хөдөлгөөнийг үндэсний үйлдвэрлэгчид, ард иргэд бүгд дэмжиж байна. Энэхүү хөдөлгөөний хүрээнд УИХ-аас баталсан 36-р тогтоол батлагдан гарч, энэ салбарт эрх зүйн орчны дэвшил гарсан. Хүнс үйлдвэрлэгчид бол энэ баримт бичгийн гол амин сүнс юм. Өнөөдрийн байдлаар хүнс, хөдөө аж ахуйн салбарт баялаг бүтээж буй үйлдвэрлэгчдийг бага хүүтэй, урт хугацаатай зээлээр дэмжих ажил нэлээн урагштай явж байна. “Тэнгэрийн Хишиг” компанийн хувьд Монгол Улсын үлгэр жишээ үйлдвэр гэж харж байна. Анх хоёрхон хүн 30 мянган төгрөгтэй нийлж, подвалнаас эхэлсэн энэ бизнес 25 жилийн уйгагүй хөдөлмөрийн хүчинд жилд 6 тэрбумын орлоготой, улсад сар бүр 40 сая төгрөгийн татвар төвлөрүүлдэг томоохон аж ахуйн нэгж болжээ.
“Тэнгэрийн Хишиг” ХХК-ийн Үүсгэн байгуулагч Р.Мягмарсүрэн
Манай хамт олон орчин үеийн дэвшилтэт техник, технологиор чанартай эрүүл хүнс үйлдвэрлэн хэрэглэгчдийн тэргүүн сонголт байхыг зорьдог. Миний хувьд хүнсний салбар гэдэг хөдөлмөрлөж чадсан хүнд үр өгөөжөө өгдөг гэдгийг биеэрээ мэдэрсэн. Үйл ажиллагаагаа явуулж эхэлсэн үеэсээ бүтээгдэхүүний амт, чанарт анхаарч, зогсолтгүй хөдөлмөрлөсөөр ирсэн. Үүнд манай үе үеийн ажилчдын хувь нэмэр ч их бий. Цаашид илүү их хөгжиж дэвшихэд төр засгийн зөв бодлого хэрэгтэй гэж бодож байна. Бидэнд хөнгөлөлттэй, бага хүүтэй зээл олддоггүй тул аль болох өөрсдөө болгохыг хичээдэг. Зээл олдсон ч өндөр хүүтэй тул хүндрэлтэй байдаг. Харин Монгол Улсын Ерөнхийлөгчийн санаачилсан “Хүнсний хангамж, аюулгүй байдал” үндэсний хөдөлгөөний хүрээнд бидэнд олон боломж бүрдсэн тухай мэдээллийг аваад их баярлаж байна. Бидэнд дутагдаж байсан бодлого шийдвэрүүд дийлэнх нь багтжээ.
