Монгол Улсын Ерөнхийлөгч Ухнаагийн Хүрэлсүх өнөөдөр /2023.02.07/ “Хүнсний хангамж, аюулгүй байдал” үндэсний хөдөлгөөний хүрээнд гурилан бүтээгдэхүүн үйлдвэрлэгч “Өгөөмж Архад” компанид ажиллалаа.

“Өгөөмж архад” компани нь 2000 онд өрхийн үйлдвэрлэлийн хүрээнд, түрээсийн байранд үйл ажиллагааныхаа гарааг эхэлж байсан бол, өнөөдөр 130 гаруй хүнийг ажлын байраар хангасан, чанарын өндөр түвшинд бүтээгдэхүүн үйлдвэрлэдэг томоохон компани болон өргөжжээ. Тус компани Монгол Улсын гурилан бүтээгдэхүүний зах зээлийн 15 хувийг эзэлдэг бөгөөд сүүлийн гурван жилийн борлуулалт 15-20 хувиар тогтвортой өссөн байна.

Монгол Улсын Ерөнхийлөгч У.Хүрэлсүхийн санаачилсан “Хүнсний хувьсгал” үйлдвэрлэгч бидэнд ихээхэн найдлага төрүүлж байна

“Дотоодын үйлдвэрлэл эрхлэгч аж ахуй нэгжүүд Монгол улсын албан татварын 80 гаруй хувийг бүрдүүлдэг. Үүгээр барахгүй ажлын байр, хот тохижилт цаашлаад эдийн засгийн гол тулгуур болж ч ирсэн. Тиймээс жижиг мэт боловч олон бэрхшээл дагуулдаг олон зүйл үйлдвэрлэгч бидэнд бий. Эдгээр зүйлүүдийг тодорхой болгож өгөөсэй гэж хүсдэг. Монгол Улсын Ерөнхийлөгч У.Хүрэлсүхийн санаачилсан “Хүнсний хувьсгал” үйлдвэрлэгч бидэнд ихээхэн найдлага төрүүлж байна. Хэрэв энэ ажил бодит биеллээ олж чадвал зөвхөн үйлдвэрлэгчид бид төдийгүй монголын иргэн бүрт өгөөжтэй зүйл болно” хэмээн тус компанийн зүгээс илэрхийлэв.