Монгол Улсын Ерөнхийлөгч У.Хүрэлсүхийн санаачилсан “Хүнсний хувьсгал”- ын хүрээнд “Баялаг бүтээгчдийг дэмжих холбоо”-ноос орон нутгийн баялаг бүтээгчдийг дэмжих зорилгоор “Үндэсний үйлдвэрүүдтэй танилцаж туршлага судлах тур аялал-2023”-ыг үе шаттайгаар зохион байгуулах ажлыг эхлүүлээд байна.
ББДХ-ны 21 аймгийн салбар хороодын “Үндэсний үйлдвэрүүдтэй танилцаж туршлага судлах тур аялал-2023” Сүхбаатар аймгаас эхэллээ.
Баялаг бүтээгчдийг төв холбооны удирдлагууд хүлээн авч уулзлаа. Уулзалтаар Ерөнхийлөгчийн Үйлдвэр, үйлчилгээний бодлогын зөвлөх Ч.Даваабаяр ирэх 5 жилийн хугацаанд хүнсний хангамж, аюулгүй байдлыг сайжруулах, хүнсний гол нэрийн 19 төрлийн бүтээгдэхүүнээр хангах талаар төрөөс баримталж буй бодлого, мөн Улсын Их Хурлын Түр хороо 2023 оны 01 дүгээр сарын 11-ний өдөр Засгийн газарт чиглэл өгөх тухай тогтоолын талаар танилцууллаа.
Тогтоолд “…зээлдэгчийн төлөх хүүг 3.0-5.0 хувь байхаар тооцож, нийт зээлийн 30-аас доошгүй хувийг хөдөө аж ахуйн үйлдвэрлэл шинээр эрхэлж байгаа болон жижиг, дунд бизнес эрхлэгч иргэн, аж ахуйн нэгж үйл ажиллагаагаа өргөтгөх, 10-аас доошгүй хувийг импортыг орлох, экспортод чиглэсэн төслүүдэд гүйцэтгэлтэй нь уялдуулан үе шаттай санхүүжилт олгох…” зэргийг тусгажээ.
Мөн 2023 оны хоёрдугаар сарын 08-ны өдрийн Засгийн газрын ээлжит хуралдаанаар хөдөө аж ахуй, хүнсний үйлдвэрлэл эрхэлдэг ААН-үүдэд зээлийн хүүгийн татаас 13% хүртэл олгохоор шийдвэрлэсэн.
Үйлдвэрлэл эрхлэгчдэд санхүүгийн дэмжлэг, мөн аж үйлдвэр хөгжсөн улсаас болон дотоодын инновац шингэсэн мега үйлдвэрүүдээс туршлага судлах, харилцаа холбоо үүсгэх чухал. Баялаг бүтээгчид Улаанбаатар хотын үйлдвэрүүд, гар урлал, эрчимжсэн аж ахуйтай танилцаж, туршлага судаллаа. Арга хэмжээнд Баруун-Урт, Халзан, Уул-Баян, Дарьганга зэрэг сумын 20 баялаг бүтээгч оролцлоо.
Төв аймгийн Баяндэлгэрт байрлах мах, сүүний чиглэлийн эрчимжсэн үхрийн фермтэй танилцаж, туршлага судлалаа.
Сүхбаатар аймгийн баялаг бүтээгчид “Их Эзэн Чингис хааны музей”-гээр зочилж эх түүхээ судлалаа.
Нийтийн хоолны тоног, төхөөрөмж, худалдаа үйлдвэрлэлээр Монголдоо манлайлагч “ЧИГЛЭЛ” компанийн үйл ажиллагаатай танилцаж туршлага судлаж сургалтад хамрагдав. Салбарын тэргүүлэгчид намрын үзэсгэлэнд худалдаандаа оролцох урилга өглөө.
Уг хөтөлбөр нь 3 өдрийн турш үргэлжилнэ. Цаашид “Баялаг бүтээгчдийг дэмжих холбоо”-ноос орон нутгийн баялаг бүтээгчдийг үндэсний үйлдвэрүүдтэй танилцаж, туршлага судлах арга хэмжээг аймаг, нийслэлээр үе шаттайгаар зохион байгуулна.
