Монгол Улсын Ерөнхийлөгч Ухнаагийн Хүрэлсүх XVII жарны “Үзэсгэлэн болгогч” хэмээх усан туулай жилийн Цагаан сарын баярыг тохиолдуулан, хүнс, хоол үйлдвэрлэлийн тоног төхөөрөмж, багаж хэрэгслийн үйлдвэрлэлийн салбарт тасралтгүй 45 жилийн хөдөлмөрөө зориулсан “Чиглэл” компанийн үүсгэн байгуулагч, баялаг бүтээгч Цэгмэдийн Бумцэндийг аж үйлдвэрийн гавьяат ажилтан цолоор шагналаа.
Цэгмэдийн Бумцэнд нь 1960 онд Өвөрхангай аймаг, Өлзийт суманд мэндэлж, 1979-1980 онд Ажилчны районы худалдаа нийтийн хоолны трестэд Механикч, 1980-1983 онд Ардын цэргийн 126-р дугаар ангид Ахлагч тоног төхөөрөмжийн механикч, 1983-1991 онд ХБЯ-ны харъяа худалдааны тоног төхөөрөмжийн засвар, зарлал чимэглэлийн газарт Тоног төхөөрөмжийн механикч, 1991-1996 онд Чиглэл ББХХоршоонд Эрхлэгч, 1996 оноос Чиглэл ХХК-ийн захиралаар ажиллаж байна.
Тэрбээр Хүнс, хоол үйлдвэрлэлийн тоног төхөөрөмж, багаж хэрэгслийн үйлдвэрлэлийн салбарт 45 жилийн хөдөлмөрөө зориулахдаа хүн амын эрүүл аюулгүй байдлыг сахин хамгаалах, импортыг орлох бүтээгдэхүүн үйлдвэрлэх, нийлүүлэлтдээ үндэсний болон олон улсын эрүүл ахуйн чанар, стандартын шаардлагыг мөрдөж, хөдөлмөрийн аюулгүй байдлыг хангаж, чанарын удирдлагын тогтолцоог тасралтгүй сайжруулан, хэрэглэгчээ дээдлэн салбартаа тэргүүлэн ажиллахын зэрэгцээ 160 гаруй ажлын байрыг бий болгоод буй баялаг бүтээгч юм.
Ц.Бумцэнд болон гэр бүл, үр хүүхэд, хамт олонд нь элгээрээ энх амгалан, төрлөөрөө түвшин амгалан сар шинэдээ сайхан шинэлэхийн өлзийтэй ерөөлийг өргөн дэвшүүлье.
