Элэг нэгт ахан дүүс, эрхэм зон олон та бүхэндээ XVII жарны “Үзэсгэлэн болгогч” хэмээх усан туулай жилийн хаврын тэргүүн сарын шинийн нэгний мэндийг өргөн дэвшүүлж, үр тариа амтлаг болоод арвин, үйлс бүхэн дэлгэрч байхын өлзийтэй ерөөлийг дэвшүүлье.
Монголчууд бид цагаан сараар цагаан идээ засдаг нь хиргүй цагаан сэтгэл, эв найрамдлыг бэлгэддэг уламжлалтай. Тиймээс сар шинийн баяраар үгийн сайныг хэлэлцэж, үйлийн сайныг урлаж, ураг төрөл, азай буурлуудтайгаа учран золгодог билээ.
Улиран одож буй бар жилд монголчууд удаан хүлээсэн, томоохон ажлуудаа эхлүүлж чадсан, урагштай жил болж өнгөрлөө.
Үүний нэг жишээ Монгол Улсын Ерөнхийлөгч Ухнаагийн Хүрэлсүхийн санаачилсан 19 нэр төрлийн хүнсний бүтээгдэхүүнээр дотоодын хэрэгцээгээ бүрэн хангаж, цаашлаад экспортлогч улс болох, эх орондоо хүнсний хувьсгал хийх зорилготой “Хүнсний хангамж, аюулгүй байдал” үндэсний хөдөлгөөн 2022.06.17-ны өдрөөс хэрэгжиж эхэлсэн.
Тус хөдөлгөөний хүрээнд бүхий л төрийн болон төрийн бус байгууллага, олон улсын байгууллага, үндэсний үйлдвэрлэгч, баялаг бүтээгчид нэгдэн ажиллаж байна. Мөн энэ ажилд төрийн тэргүүн онцгой ач холбогдол өгөхийн зэрэгцээ, үндэсний үйлдвэрлэгчид, баялаг бүтээгчид гол тулгуур нь гэдгийг илэрхийлээд буй.
Энэ хүрээнд 40 гаруй үйлдвэрт биечлэн ажиллаж, санал хүсэлтийг нь сонсон, зарим асуудлыг газар дээр нь шийдвэрлэсэн.
Тухайлбал ХХАА-н салбарын үйлдвэрлэгчдэд бага хүүтэй, урт хугацаатай зээл олгож, импортын татварыг үе шаттай нэмэгдүүлэх замаар хамгаалан, төрийн худалдан авалтаар дэмжих зэрэг ажлууд биеллээ олж байна.
Үүнээс үзэхэд “Хүнсний хангамж, аюулгүй байдал” үндэсний хөдөлгөөн маш богино хугацаанд, олон үр дүнд хүрчээ. Цаашид ч илүү их амжилт бүтээл гаргана гэдэгт итгэлтэй байна.
Монгол төрийн бодлогын цөм нь монгол хүн, монгол өрх байх учиртай. Хүнс эрүүл байвал хүн эрүүл байна. Монгол хүн эрүүл байвал монгол үндэстэн хүчирхэг байна.
Морилон ирж буй “Үзэсгэлэн болгогч” хэмээх усан туулай жилдээ Аагтай шаргал цайг нарны туяатай самарч Алтан төрийн сүлдтэй хоймрын бурхандаа дээжлээд Ирэх жилийн төөргийг итгэлийн өнгөөр сүлж Тэргүүн сарын шинийн нэгэндээ энх мэнд золгож Түмэн олон минь сар шинэдээ сайхан шинэлээрэй.