Монгол Улсын Ерөнхийлөгч У.Хүрэлсүхийн санаачилгаар хэрэгжиж буй “Хүнсний хангамж, аюулгүй байдал” үндэсний хөдөлгөөний хүрээнд Ерөнхийлөгчийн Үйлдвэр, үйлчилгээний бодлогын зөвлөх Ч.Даваабаяр үндэсний үйлдвэрлэгчдийн үйл ажиллагаатай танилцаж байна. Өнөөдөр үндэсний үйлдвэрлэгч “Юргана Индастри” ХХК-ийн үйл ажиллагаатай танилцлаа.
Экологийн цэвэр бүтээгдэхүүн үйлдвэрлэгч “Юргана индастри” ХХК нь 2022 он 03 дугаар сард Монголын уламжлалт анагаах ухааны жороор эмийн бүтээгдэхүүн үйлдвэрлэгч “Одь Тан” ХХК-аас тусгаарлан үүсгэн байгуулагдаж, гоо сайхан, ахуйн бүтээгдэхүүн үйлдвэрлэж байна. Тухайлбал:
- АХУЙН БҮТЭЭГДЭХҮҮН
- ҮС АРЧИЛГААНЫ БҮТЭЭГДЭХҮҮН
- АРЬС АРЧИЛГААНЫ БҮТЭЭГДЭХҮҮН
- ЭРҮҮЛ МЭНДИЙН БҮТЭЭГДЭХҮҮН
зэрэг бүтээгдэхүүнүүдийг үйлдвэрлэн зах зээлд нийлүүлэхийн зэрэгцээ 60 гаруй ажлын байрыг бий болгоод байгаа баялаг бүтээгч юм.
Дашрамд дурдахад монгол улсын гаалиар орж ирдэг бүтээгдэхүүний тоон мэдээллээс үзэхэд амны хөндийн ариун цэврээ сахихын тулд шүдний оо, ам зайлагч, шүд чигчлэх мяндсан утас зэргийг хэрэглэдэг. Эдгээр нь манай улсад БНХАУ, БНСУ, АНУ, Индонез зэрэг 30 улс орноос импортоор орж ирдэг байна. Үндэсний үйлдвэрлэгч “Юргана индастри” ХХК дэлхийд анх удаа аарцтай шүдний ОО-ны технологи боловсруулж гаргаснаар 100 хувь Монгол гарал үүсэлтэй бүтээгдэхүүн дэлхийн брэнд болох боломжтой болж байна.
