Монгол Улсын Ерөнхийлөгч У.Хүрэлсүхийн санаачилсан “Хүнсний хангамж, аюулгүй байдал” үндэсний хөдөлгөөн орон даяар эрчимжиж, үндэсний үйлдвэрлэгчид, баялаг бүтээгчдийн дэмжлэгтэй бодит үр дүн гаргасаар байна. Энэ хүрээнд Монгол Улсын Ерөнхийлөгчийн Үйлдвэр, үйлчилгээний бодлогын зөвлөх Ч.Даваабаяр 82 дахь үйлдвэртээ ажиллаж, санал хүсэлтийг нь сонслоо.

• 500 жилийн түүхтэй жор дамжлагад суурилсан бүтээгдэхүүн үйлдвэрлэж байна

“Одь тан” эмийн болон ургамлын гаралтай цайны үйлдвэр нь 124 төрлийн уламжлалт эм, 8 цай, 15 эрүүл мэндийн бүтээгдэхүүн үйлдвэрлэж байна. Нийт 54 хүнийг ажлын байраар хангаж, Солонгос, Хятад, АНУ, ОХУ-руу бүтээгдэхүүнээ экспортлож буй юм.

Монголын уламжлалт анагаах ухаан нь 5000 жилийн түүхтэй. Харин Одь тан үйлдвэр нь тасралтгүй 9 үе дамжсан, 500 орчим жилийн түүхтэй жор дамжлагад суурилсан бүтээгдэхүүн үйлдвэрлэж байна. Монгол орны шимт хөрсөнд ургасан байгалийн зэрлэг эмийн ургамлууд болон органик эмийн ургамлын плантацид 50 гаруй зүйлийн үйлдвэрийн хэрэгцээт түүхий эдийг тариалж байна. Мөн Хараагүйчүүдийн төв болон СХД-ийн Жижиг, дунд үйлдвэрийг дэмжих төвийн дэргэдэх эмэгтэйчүүдийн оёдлын холбоотой хамтран ажиллаж байна.

Тус үйлдвэрийг үүсгэн байгуулагч, Уламжлалт анагаах ухааны ахлах зэргийн эмч, АУ-ны магистр Б.Ширчинмаа нь “Хүнсний хангамж, аюулгүй байдал” үндэсний хөдөлгөөнд нэгдэн, дэмжиж ажиллахаа илэрхийлсэн бөгөөдтус хөдөлгөөн үндэсний үйлдвэрлэгчдэд таатай боломж бүрдүүлж өгч байгааг онцоллоо.

• Амьдралыг ургуулах “Ургана” брэнд

Өргөн хэрэглээний болон гоо сайхны бүтээгдэхүүнийг Монголын уламжлалт анагаах ухааны жорыг орчин үеийн технологиор Монголдоо үйлдвэрлэдэг үндэсний үйлдвэрлэгч “Ургана” брэнд “Хүнсний хувьсгал”-д нэгдлээ.

“Юргана индастри” ХХК нь 2022 он 03 дугаар сард Монголын уламжлалт анагаах ухааны жороор эмийн бүтээгдэхүүн үйлдвэрлэгч “Одь Тан” ХХК-аас тусгаарлан үүсгэн байгуулагдсан гоо сайхан, ахуйн бүтээгдэхүүн үйлдвэрлэгч компани юм. 400 гаруй жилийн түүхтэй уламжлалт анагаах ухааны жорын дамжлагыг орчин үеийн техник технологи, судалгааны үр дүнтэй хослуулан эрүүл мэнд, гоо сайхан, эрүүл ахуй, ариутгалын бүтээгдэхүүнүүдийг GMP шаардлагын дагуу баригдсан орчин үеийн үйлдвэртээ үйлдвэрлэж Монголын зах зээлд нийлүүлж байна. Мөн монголын уламжлалт анагаах ухааныг дэлгэрүүлэгч байгууллагын хувьд 100 хувь эх орны эрүүл хөрсөнд тарьж ургуулсан эмийн ургамал болон байгалийн элементүүдээр бүтээгдэхүүнээ үйлдвэрлэн хэрэглэгчиддээ хүргэж байна.

Тус брэнд нь нийт 56 төрлийн бүтээгдэхүүн үйлдвэрлэж, 77 хүнийг ажлын байраар хангадаг.

• Дусал бүр нь витамин “Дархлаа+” органик ундаа

Монголын ардын уламжлалт анагаах ухаанд өргөн хэрэглэгддэг эмт ургамлууд дээр хийсэн судалгаа, шинжилгээ, туршилтын ажлын үр дүнг үйлдвэрлэлд нэвтрүүлэх замаар шингэн хүнсний салбарт шинэчлэл хийх хүсэл тэмүүлэлтэй “Дархлаа+” органик ундааг үйлдвэрлэгч “Эко жүүс” ХХК “Хүнсний хувьсгал”-ыг дэмжиж ажиллахаа илэрхийллээ.

Монгол орныхоо байгалийн өгөөжийг монгол хүн бүрт хүртээх нь тус хамт олны эрхэм зорилго юм.

Манай Улсад 7000 гаруй төрөл зүйлийн ургамал бүртгэгдсэн байдаг. Үүнээс 250 орчим ургамал, эрдэс бодисыг хүнсний болон эмийн чиглэлээр хэрэглэж байна. “Эко жүүс” компанийн хувьд хамгийн өндөр ач холбогдолтой 5 ургамлыг ашиглан хүний эрүүл мэндэд өндөр ашигтай 5 төрлийн ундааг үйлдвэрлэж байна. Тодруулбал тэхийн шээг, аньсны навч,чага мөөг, барагшун, хүрэн манжингаар ундаа үйлдвэрлэж буй юм.

• Өдрийн өнгө өглөөний хоолноос

“Монфүүдланд” компани нь 2014 онд байгуулагдаж, монголд анх удаа овьёосны өглөөний хоол бэлтгэж, хэрэглэгчдэд хүргэж байжээ. Тус хамт олон хүний эрүүл мэндэд сайнаар нөлөөлөх үр тариа, жимс жимсгэнээр эслэгийн өндөр агууламжтай цэнэглэгч, элдэвтэй гурил гэх мэт 30 гаруй нэр төрлийн бүтээгдэхүүн үйлдвэрлэдэг.

Овьёосонд аминдэм, шим тэжээлийн агууламж өндөр байдаг тул нь экзем, дерматит гэх мэт арьсны төрөл бүрийн өвчнийг илааршуулах шилдэг эм болдог. Мөн овьёос нь цагаан хоолтон, веган хүмүүсийн уургийн хэрэглээгээ хангах хамгийн зөв сонголт байдаг. Уургаас гадна овьёосонд байдаг E аминдэм, антиоксидант, глютамин нь булчингийн өсөлтийг түргэсгэх үйлчилгээтэй. Энэ утгаараа “Монфүүдланд” компанийн бүтээгдэхүүнүүд олон талын ашиг тустай.

Монгол Улсын Ерөнхийлөгч У.Хүрэлсүхийн санаачилсан “Хүнсний хангамж, аюулгүй байдал” үндэсний хөдөлгөөн үндэсний үйлдвэрлэгч, жижиг, дунд үйлдвэр эрхлэгчдийг анхаарч, бодлогын түвшинд дэмжлэг үзүүлж байгаад тус компанийн хамт олон олзуурхаж, хамтран ажиллахаа илэрхийллээ.

“Хүнсний хувьсгал”-ын хүрээнд Монгол Улсын Ерөнхийлөгч У.Хүрэлсүх болон Ерөнхийлөгчийн үйлдвэр, үйлчилгээний бодлогын зөвлөх Ч.Даваабаяр нар нийтдээ 110 орчим үйлдвэрт ажиллаж, санал хүсэлтийг нь боломжит богино хугацаанд шийдвэрлээд байна. Өнөөдрийн /2023.03.07/ баялаг бүтээгчдийн хувьд маркетинг сурталчилгаа болон дотоодын олон салбартай сүлжээ дэлгүүрүүдтэй хамтран ажиллах шаардлагатай байгааг онцлов. Өөрөөр хэлбэл ЖДҮҮ эрхлэгч нарт бүтээгдэхүүнээ олон нийтэд таниулах, ач холбогдлыг нь ойлгуулахад хүндрэлтэй байдаг бол сүлжээ дэлгүүрүүд импортын бараа бүтээгдэхүүнийг хэрэглэгчдийн нүдэнд ил байршуулдаг, дотоодын бүтээгдэхүүнийг дэмжих нь бага байдаг гэсэн юм.

Дэлхий дахинд тулгамдаж буй ОХУ Украины дайн, уур амьсгалын өөрчлөлт, хүн амын өсөлт, эдийн засгийн шок зэрэг асуудлын улмаас “хүнсний хямрал” үүсэж буйг олон улсын байгууллагууд онцолж байна. Иймд Монгол Улсын Ерөнхийлөгч У.Хүрэлсүх дотоодын хэрэгцээгээ 19 нэр төрлийн хүнсний бүтээгдэхүүнээр хангаж, цаашлаад экспортлогч улс болох санаачилга дэвшүүлэн, энэ хүрээнд баялаг бүтээгчдээ дэмжих ажил үргэлжилж байна.

“Хүнсний хангамж, аюулгүй байдал” үндэсний хөдөлгөөн хэрэгжээд 8 сарын хугацаа өнгөрч байгаа ч маш олон бодит үр дүн гаргажээ. Тухайлбал үйлдвэрлэгчдэд бага хүүтэй, урт хугацаатай зээл олгож, импортын барааны татварыг 20 хүртэлх хувиар нэмэгдүүлж, дотоодын бараа бүтээгдэхүүнийг төрийн худалдан авалтаар дэмжих зэрэг том ажлууд хийгдэж байна.