Хүнсний үйлдвэрлэлийн салбарт 24 дэх жилдээ үйл ажиллагаа явуулж буй “Газар Шим Трейд” компанийн IPO үнэт цаасны анхдагч зах зээлийн захиалга нээх ёслолын арга хэмжээ өнөөдөр /2023.03.27/ Монголын хөрөнгийн бирж дээр боллоо.
Арга хэмжээнд ХХААХҮ-ийн Сайд Х.Болорчулуун, Ерөнхийлөгчийн Үйлдвэр, үйлчилгээний бодлогын зөвлөх Ч.Даваабаяр, Эдийн засагч Д.Ангар нарын албаны хүмүүс оролцлоо.
Биржийн арилжааг нээн Ерөнхий захирал Ц.Ганбат, Үйлдвэр хариуцсан захирал Ц.Төгсөө нар цан цохиж захиалгын сан албан ёсоор нээгдлээ.
Тус компани өөрийн зах зээлийн үнэлгээгээ 63.5 тэрбум төгрөгөөр үнэлсэн байна. Үүний 16.54 хувь буюу нэг бүр нь 53 төгрөгийн үнэ бүхий нийт 198 сая ширхэг хувьцааг олон нийтэд санал болгож зах зээлээс 10.5 тэрбум төгрөг босгохоор төлөвлөжээ.
Манай улс даршилсан бүтээгдэхүүний 80 хувийг импортоор авдаг байсан бол “Газар шим” компани ийнхүү олон нийтэд хувьцаагаа гаргаж, хөрөнгө оруулалт татсанаар даршилсан ногоо, салат, компотны 50 хувийг дотоодоосоо хангах томоохон зорилт дэвшүүлж байна.
