Монгол Улсын Ерөнхийлөгчийн санаачилсан ”Хүнсний хангамж, аюулгүй байдал” үндэсний хөдөлгөөний хүрээнд Хүнс, хөдөө аж ахуйн салбарын жижиг, дунд үйлдвэр, үйлчилгээ эрхлэгч нарт батлан даалттай зээлд хамрагдах боломж, шийдлийг танилцуулах, санал солилцох уулзалт хэлэлцүүлэг өнөөдөр /2023.04.04/ Блью скай тауэр, 2 давхарт, Эмералд хурлын танхимд болж байна.
Тус арга хэмжээг нээж Ерөнхийлөгчийн Эдийн засгийн бодлогын зөвлөх Б.Даваадалай үг хэллээ. Мөн:
- Зээлийн батлан даалтын сангийн Эрсдэлийн удирдлагын газрын дарга Д.Батзогсох
- Хөгжлийн Шийдэл ТББ, Төсөл хөтөлбөр хариуцсан менежер Б.Хишигсүрэн
- Эдийн засаг, хөгжлийн яамны Бүс нутаг, аж үйлдвэрийн бодлогын газрын дарга Д.Эрдэнэбаяр
- Хүнс, хөдөө аж ахуй, хөнгөн үйлдвэрийн яамны Жижиг, дунд үйлдвэрийн газрын дарга Я.Эрдэнэсайхан
- Монголын банкны холбооны гүйцэтгэх захирал Л.Амар нар хүрэлцэн ирсэн 100 гаруй үйлдвэрлэгч, баялаг бүтээгчдийн асуултад хариулж, дэлгэрэнгүй мэдээлэл өглөө.
Зээлийн батлан даалтын сангийн гол үйлчлүүлэгчид нь ЖДҮҮ эрхлэгчид байдаг. Гэвч хэрхэн, яаж үйлчлүүлэх тухай мэдээлэл байдаггүйгээс гадна, олон сөрөг ойлголтууд тэдний дунд бий.
Харин төрийн тэргүүний санаачилгаар хэрэгжиж буй “Хүнсний хангамж, аюулгүй байдал” үндэсний хөдөлгөөний хүрээнд УИХ-аас 36-р тогтоолыг батлан гаргаж, хамтран хэрэгжүүлэх байгууллагуудын тоонд Зээлийн батлан даалтын санг оруулсан. Ингэснээр зөвхөн хүнс, хөдөө аж ахуйн салбарын үйлдвэрлэгчид бус нийт баялаг бүтээгчдэд бүтээгдэхүүн, үйлчилгээгээ таниулах, өргөн хүрээнд үйлчлэх боломж бүрдэж байгааг онцолсон юм.
Мөн үйлдвэрлэгчдээс гадна хамтран ажилладаг банк, санхүүгийн байгууллагуудын эдийн засагч, холбогдох ажилтнуудыг мэдээллээр хангах нь чухал. Ингэж чадаагүйгээс үйлчилгээ авахаар зорин очсон иргэд буруу мэдээлэл авах эрсдэлтэй байдаг гэв.
