Дотоодын хэрэгцээгээ 19 нэр төрлийн хүнсний бүтээгдэхүүнээр бүрэн хангаж, цаашлаад экспортлогч улс болох зорилготой “Хүнсний хангамж, аюулгүй байдал” үндэсний хөдөлгөөний хүрээнд Ерөнхийлөгчийн Үйлдвэр, үйлчилгээний бодлогын зөвлөх Ч.Даваабаяр дотооддоо өндөр зэрэглэлийн бяслаг үйлдвэрлэж байгаа “Cheese republic Mongolia” хөдөлгөөний санаачлагч Я.Энхээтэй уулзаж, тус салбарын орчин нөхцөл, тулгамдаж буй асуудлын талаар ярилцлаа.
Монгол Улсад импортоор орж ирж буй хиймэл бяслагуудыг бид жинхэнэ бяслаг гэж ойлгон хэрэглэдэг. Энэ нь малын сүүгээр бус өөр бүтээгдэхүүнээр хийдэг бөгөөд их хэрэглэсэн тохиолдолд хүний эрүүл мэндэд маш хортой. Тухайлбал хавдар үүсгэх, элэгний үйл ажиллагаанд сөргөөр нөлөөлөх, илүүдэл жин нэмэх гэх мэт. Иймд бид өөрсдөд байгаа нөхөн төлждөг баялаг болох хөдөө аж ахуйн бүтээгдэхүүн, ялангуяа малын сүүг ашиглан дотооддоо сайн чанарын бяслаг хийх хэрэгцээ шаардлага тулгарч байна.
Гэвч хэрэглэгчдийн мэдлэг мэдээлэл бага, энэ төрлийн бүтээгдэхүүний зах зээл хөгжөөгүй, төр засгийн дэмжлэг огт байдаггүй зэргээс шалтгаалж монголд байдаг цөөхөн хэдэн бяслагны үйлдвэрүүд хөл дээрээ зогсож чадахгүй байна гэдгийг уулзалтын үеэр онцолсон юм.
Мөн монголын бяслаг үйлдвэрлэгч 7 компани нэгдэн “Мэргэшсэн бяслаг үйлдвэрлэгчдийн холбоо”-г үүсгэн байгуулж, энэ салбарыг хамтран хөгжүүлэхээр зориг шулууджээ.
Өнөөдрийн байдлаар 20 орчим нэр төрлийн бүтээгдэхүүн үйлдвэрлэдэг. Үүнд хаягдал болдог шар сүүг ашиглан үйлдвэрлэсэн хүний эрүүл мэндэд олон талын ашиг тустай “Super” ундаа багтаж байна.
