Монгол Улсын Ерөнхийлөгч У.Хүрэлсүх “Хүнсний хангамж, аюулгүй байдал” үндэсний хөдөлгөөний хүрээнд үндэсний үйлдвэрлэгч “Еден” компанид ажиллалаа.
“Еден” ХХК нь 2005 оны 7 дугаар сарын 5-нд зөгийн балны үйлдвэрлэлээр үйл ажиллагаагаа эхлүүлсэн бөгөөд 2010 оноос “ЕДЕН” нэрийн нэрс, аньс, чацарганы өтгөрүүлсэн шүүсийг үйлдвэрлэж хүн амын эрүүл мэнд, хүнсний манаанд 23 дахь жилдээ зүтгэн ажиллаж буй баялаг бүтээгч юм.
Байгалийн цэвэр жимс, жимсгэнийг боловсруулж импортийн бүтээгдэхүүнийг орлохуйц хямд, чанартай бүтээгдэхүүнийг зах зээлд нийлүүлэх, цаашилбал экспортонд гаргах зорилгоор байгуулагдаж байсан тус компани эдүгээ 80 гаруй ажилтантай, 16 нэр төрлийн жимсний чанамал, өтгөрүүлсэн шүүс, хоногт 20.000-25.000 ширхэг бүтээгдэхүүн үйлдвэрлэн орон нутгийн 300 гаруй бэлтгэн нийлүүлэгч, бүтээгдэхүүн борлуулагч 5000 гаруй харилцагчиддаа хүргэж байна.
Төрийн тэргүүний санаачилсан “Хүнсний хувьсгал” үндэсний үйлдвэрлэл хөгжих боломжийг нээж өгч байна.
“Монгол зэрлэг жимсний экспортыг нэмэгдүүлнэ” хэмээн алсын хараагаа тодорхойлсон тус компани энэ оны зургаадугаар сард үйлдвэрлэлийн хүчин чадлаа 50.000-60.000 ширхэг бүтээгдэхүүн болгон нэмэгдүүлэхээр төлөвлөжээ.
Тус компанийн зүгээс импортоор орж ирдэг ижил төрлийн бүтээгдэхүүний гаалийн татварыг нэмэгдүүлэх, шинээр байгуулагдаж буй үйлдвэрийн дэд бүтцийн холболтын зөвшөөрөл /ус, дулаан, уур гэх мэт/авахад дэмжлэг үзүүлэх, “Тэрбум мод” үндэсний хөдөлгөөний хүрээнд жишиг жимс тариалах аж ахуй эрхлэх газрын зөвшөөрөлд дэмжлэг үзүүлэх асуудлыг шийдвэрлэж өгөхийг хүслээ. Мөн “Төрийн тэргүүний санаачилсан “Хүнсний хувьсгал” нь үндэсний үйлдвэрлэл хөгжих боломжийг нээж өгч байна” гэв.
