Монгол Улсын Ерөнхийлөгч Ухнаагийн Хүрэлсүх бяслаг үйлдвэрлэгчидтэй уулзаж, санал хүсэлтийг сонслоо.
Тэрээр хүнсний хангамж, аюулгүй байдлыг онцгой анхаарч, өнгөрөгч оны тавдугаар сард Монгол Улсын Үндэсний аюулгүй байдлын зөвлөлийг хуралдуулж, зөвлөмж гарган, УИХ-ын чуулганы нэгдсэн чуулганд дэлгэрэнгүй мэдээлэл хийж, улс орон даяар “ХҮНСНИЙ ХУВЬСГАЛ” эхлүүлсэн.
Дотоодын хэрэгцээгээ 19 нэр төрлийн хүнсний бүтээгдэхүүнээр бүрэн хангаж, цаашлаад экспортлогч улс болох зорилготой “Хүнсний хангамж, аюулгүй байдал” үндэсний хөдөлгөөнийг эрчимжүүлэх хүрээнд төрийн тэргүүн манлайлал үзүүлж өөрийн биеэр үндэсний үйлдвэрүүдэд ажиллаж, санал хүсэлтийг нь сонсож, шийдвэрлэж байгаа бөгөөд өнөөдөр /2023.04.13/ бяслаг үйлдвэрлэгчидтэй уулзаж, санал хүсэлтийг сонслоо.
Монголын бяслаг үйлдвэрлэгч 7 компани нэгдэн “Мэргэшсэн бяслаг үйлдвэрлэгчдийн холбоо”-г үүсгэн байгуулж, энэ салбарыг хамтран хөгжүүлэхээр зориг шулууджээ.
Тухайлбал:
- Төв аймаг Баянцогт сумын “Файн Чийз” ХХК /Моцарелла, Хатуу бяслаг, Түрхлэг, Пармезан, Зөөлөн зэрэг үнээний сүүний бяслаг/,
- 4 аймагт төрөлжсөн үйлдвэрүүдтэй “Силкроуд Мэжих” ХХК, /Моццарелла, Чеддар, Уулын, Раклет, Ивэн, Зайсантолгой зэрэг үнээ, сарлагийн бяслаг/,
- Баян-Өлгий аймаг Цэнгэл сумын “Чинагийн Галсан сан” ТББ /Тува Яки нэртэй бяслагийг сарлагийн сүүгээр үйлдвэрлэнэ/,
- Баянхонгор аймаг Эрдэнэцогт сумын “Сүүн Билэгдэл” ХХК /Хонгор Чеддар, Хонгор Грюйер, Эрдэнэцогт-Тилзит, Эрдэнэцогт-Гауда зэрэг 4 бяслагийг сарлагийн сүүгээр хийж “Хонгор” брэндийг хөгжүүлж байна/,
- Сэлэнгэ аймаг Сант сумын “Сүүн Зам Дэйри” ХХК /Моцарелла , Хагас хатуу бяслаг болон уламжлалт цагаан идээ/,
- Төв аймаг Эрдэнэ сумын “Тэрэлж Бүл Нөхөрлөл” ТББ /Тэрэлж Гоуда бяслагийг үнээний сүүгээр үйлдвэрлэнэ/ зэрэг үндэсний үйлдвэрлэгчид нэгдэн Монголын бяслаган бүтээгдэхүүний чанар, өрсөлдөх чадварыг сайжруулах, импортыг орлох, экспортод чиглэсэн бүтээгдэхүүн үйлдвэрлэх, хүн амын бяслагны хэрэглээг дээшлүүлэх зэрэг томоохон зорилтуудыг тавин, нэгдэн нийлж ажиллаж байна
