Төрийн тэргүүний санаачилсан “Хүнсний хувьсгал”-ыг ажил хэрэг болгохоор үндэсний үйлдвэрлэгчид хамтран ажиллаж байна.
Аливаа эдийн засгийн бодлогыг хэрэгжүүлэх хүмүүс нь эцэстээ баялаг бүтээгчид байдаг. Иймд монгол улс хүнсний бүтээгдэхүүнээ дотоодоосоо бүрэн хангах чадвартай, “Үйлдвэрлэгч, баялаг бүтээгч орон” болж, хүнсний аюулгүй байдлаа бататган бэхжүүлэхэд үндэсний үйлдвэрлэгчид, иргэн хүн бүр хичээн зүтгэж, хамтран ажиллах учиртай.
Монгол Улсын Ерөнхийлөгч Ухнаагийн Хүрэлсүхийн санаачилсан “Хүнсний хангамж, аюулгүй байдал” үндэсний хөдөлгөөний хүрээнд үндэсний үйлдвэрлэгчид “Баялаг бүтээгч-Business tour” аялал хийлээ. Амралтын өдөр зохион байгуулагдаж буй энэхүү арга хэмжээгээр үндэсний үйлдвэрлэгчид “Еден” жимс, жимсгэнийн өтгөрүүлсэн шүүс, жимсний чанамлын үйлдвэртэй танилцлаа.
Арга хэмжээнд Монгол Улсын Ерөнхийлөгчийн Үйлдвэр, үйлчилгээний бодлогын зөвлөх Ч.Даваабаяр, ТЕГ-ын Татварын орлогын газрын захирал Р.Мягмаржав, ГЕГ-ын Гааль татварын ахлах байцаагч Б.Эрдэнэбат, НҮБ-ын Хөтөлбөрийн зохицуулагч Г.Мөнхболор болон 50 орчим баялаг бүтээгчид оролцлоо. Арга хэмжээг “Баялаг бүтээгчдийг дэмжих холбоо” ТББ зохион байгуулав.
“Еден” ХХК нь байгалийн цэвэр жимс, жимсгэнийг боловсруулж импортийн бүтээгдэхүүнийг орлохуйц хямд, чанартай бүтээгдэхүүнийг зах зээлд нийлүүлэх, цаашилбал экспортонд гаргах зорилгоор байгуулагдсан, эдүгээ 80 гаруй ажилтантай, 16 нэр төрлийн жимсний чанамал, өтгөрүүлсэн шүүс, хоногт 20.000-25.000 ширхэг бүтээгдэхүүн үйлдвэрлэн орон нутгийн 300 гаруй бэлтгэн нийлүүлэгч, бүтээгдэхүүн борлуулагч 5000 гаруй харилцагчиддаа хүргэдэг 100 дотоодын хөрөнгө оруулалттай аж ахуй нэгж юм.
