Монгол Улсын Ерөнхийлөгч Ухнаагийн Хүрэлсүхийн санаачилсан “Хүнсний хангамж, аюулгүй байдал” үндэсний хөдөлгөөний хүрээнд үндэсний үйлдвэрлэгчид өнөөдөр /2023.04.25/ “Баялаг бүтээгч-Business tour” аялал хийлээ.
Өөр хоорондоо туршлага судлах, санал солилцох зорилготой энэхүү арга хэмжээгээр үйлдвэрлэгчид жимс, жимсгэнийн өтгөрүүлсэн шүүс, чанамал үйлдвэрлэдэг “Еден” ХХК, бүх төрлийн хүнсний хаяг, шошго, сав баглаа боодлын хэвлэх үйлдвэр “Монлабел” ХХК-иар тус тус зочилсон бол үргэлжлүүлээд “Урин Трейд” ариун цэвэр, ахуйн цаасны үйлдвэртэй танилцлаа.
“Урин Трейд” ХХК нь 2017 оноос цаас, цаасан бүтээгдэхүүний үйлдвэрлэл явуулж эхэлсэн бөгөөд 10 гаруй нэр төрлийн бүтээгдэхүүн зах зээлд нийлүүлж байна. Мөн нийт ариун цэврийн ахуйн хэрэглээний зах зээлийн 10-20 хувийг эзэлдэг бөгөөд өдөрт 6 тонн бараа, бүтээгдэхүүн үйлдвэрлэдэг. Үйлдвэрлэлийн хувьд анхдагч түүхий эдээс эцсийн бүтээгдэхүүн болох хүртэл 10 гаруй шат дамжлага дээр 40 орчим ажилтантай үйл ажиллагаагаа явуулж байна.
