“Хүнсний хувьсгал” хөдөлгөөний хүрээнд Монгол Улсын Ерөнхийлөгчийн Үйлдвэр, үйлчилгээний бодлогын зөвлөх Ч.Даваабаяр, ХХААХҮЯ-ны Газар тариалангийн бодлогын хэрэгжилтийг зохицуулах газрын дарга Д.Есөн-Эрдэнэ, ЕТГ-ын Референт А.Амаржаргал, Зээлийн батлан даалтын сангийн Батлан даалтын газрын дарга А.Амаржаргал, Хаанбанкны Жижиг, дунд бизнесийн банкны менежер Б.Эрдэнэсүрэн нарын албаны хүмүүс /2023.05.07/ Сонгинохайрхан дүүргийн Жаргалант тосгон дахь “Түмэн сүйх” ХХК-ийн өвлийн шилэн хүлэмжийн үйл ажиллагаатай танилцаж, Монголын хүлэмжийн аж ахуй эрхлэгчдийн холбоо болон хүлэмжийн ногоочдын төлөөлөлтэй уулзаж ярилцав.
Уулзалтаар ногоочдын зүгээс Монгол Улсын Ерөнхийлөгч У.Хүрэлсүх Ерөнхий сайдаар ажиллаж байх хугацаандаа хүлэмжийн аж ахуй эрлэгчдийн тог, цахилгааны тарифыг оройн 06:00 цагаас өглөөний 06:00 цаг хүртэл хөнгөлж өгсөнийг сайшааж байлаа. Мөн төр засгаас хүнсний ногооны шинэ тоног төхөөрөмжийг гаалийн албан татвараас 2027 он хүртэл хөнгөлж, бага хүүтэй урт хугацаатай зээл банкууд олгож байгаад талархаж байгаагаа илэрхийллээ.
Дотоодын хэрэгцээгээ хангахын төлөө хүлэмжийн аж ахуй эрхлэгчдийг төр бодлогоор дэмжин, ажиллаж байна.
Монгол Улсын Ерөнхийлөгчийн Үйлдвэр, үйлчилгээний бодлогын зөвлөх Ч.Даваабаяр: Дотоодын хэрэгцээгээ хангахын төлөө ХАА, МАА, тариаланчид, хүлэмжийн аж ахуй эрхлэгчдийг төр бодлогоор дэмжин, ажиллаж байна. Тодруулбал, ХХАА-н үйлдвэрлэлийг дэмжих хүрээнд үр тариа, тос, тэжээл, төмсний үйлдвэрлэл эрхлэгчдийн бизнесийг дэмжихэд 90 тэрбум төгрөгийн зээлийг олгоно. Мөн хүн амын хүнсний хэрэглээнд хүлэмжийн ногоо чухал байр суурьтай учир дөрвөн улирлын хүлэмж шинээр байгуулахад 50, услалтын систем байгуулахад 27.1, зоорийн аж ахуй байгуулахад 90 тэрбум төгрөгийн зээл олгох шийдвэр дагаад хэрэгжээд явж байна. Хэрэгжилтийг Хүнс, хөдөө аж ахуй, хөнгөн үйлдвэрийн яам хариуцан ажиллаж байна” хэмээн ярилаа.
Мөн зарим хүнсний тоног төхөөрөмж худалдан авч байгаа ААН-ийн зардлын 50 хүртэл хувийг буцаан олгож байгаа талаар ХХААХҮЯ-ны Газар тариалангийн бодлогын хэрэгжилтийг зохицуулах газрын дарга Д.Есөн-Эрдэнэ мэдээлэл өглөө.
“Түмэн сүйх” ХХК-ийн 1998 оноос тасралтгүй үйл ажиллагаагаа явуулж байгаа бөгөөд аж ахуйгаа 2014 онд Голланд технологиор өргөжүүлэн жилийн дөрвөн улирлын турш нарийн тогоо тариалах өвлийн шилэн хүлэмжээ байгуулж, 2015 онд 0,5 га талбайд анхны суулгацаа тарьж байжээ. Өдгөө тус компани салат навч, юуцай, бууцай тариалан нийслэлийн хэрэглэгчдэд захиалгаар нийлүүлж байна.
