“Хүнсний хангамж, аюулгүй байдлыг хангах талаар авах зарим арга хэмжээний тухай” УИХ-ын 36-р тогтоолын хүрээнд ЕТГ-ын Хүнсний төсөл хөтөлбөрийн албаны төлөөллүүд өнөөдөр /2023.06.23/ хөдөө аж ахуй, газар тариалангийн “Мора Агро парк” төслийн багийг хүлээн авч уулзлаа.

Уулзалтаар Монголын жижиглэн худалдаа эрхлэгчдийн холбоо буюу “Мора” ТББ-ын гишүүд нэгдэн хөдөө аж ахуй, газар тариалангийн чиглэлээр “Мора агропарк” төсөл эхлүүлсэн бөгөөд судалгаанд суурилсан уг төсөл нь байгаль орчны нөхөн сэргээлтийг дэмжих, хүлэмжийн аж ахуй болон газар тариалангийн үр ашгийг нэмэгдүүлэх зорилготой талаар танилцууллаа.

Ерөнхийлөгчийн Зөвлөх Ч.Даваабаяр хөрсөө эрүүл байлгаж, эрүүл хөрсөнд шимтэй хүнсний ногоо тариалах, хүнсний хангамжаа сайжруулах, улмаар хүнс экспортлогч орон болох нь “Хүнсний хувьсгал” үндэсний хөдөлгөөний гол зорилгуудын нэг бөгөөд Японы дэвшилтэд технологийг Монголд нутагшуулж, экспортын хүнсний үйлдвэрлийг нэмэгдүүлэх санаачлага гарган ажиллаж байгаад талархал илэрхийллээ.

Уулзалтад

• Ерөнхийлөгчийн Үйлдвэр, үйлчилгээний бодлогын зөвлөх Ч.Даваабаяр,
• ЕТГ-ын Референт А.Амаржаргал,
• ЕТГ-ын Хүнсний төсөл, хөтөлбөр хариуцсан албаны мэргэжилтэн Д.Амарсанаа,

“Мора Агро парк” төслийн багийг төлөөлөн:

• “Мора Жи Эй” ХХК-ийн Үүсгэн байгуулагч, “Мора Агропарк” төслийн санаачлагч Ёкозүми Ёшиюки,
• “Мора” ТББ-ын тэргүүн Д.Нарантуяа,
• “Мора” ТББ-ын Удирдах зөвлөлийн гишүүн Оки Тошихару,
• “Мора” ТББ-ын Удирдах зөвлөлийн гишүүн Д.Уранцэцэг нар оролцлоо.