Монгол Улсын Ерөнхийлөгч У.Хүрэлсүхийн ивээл дор Дэлхийн экспортыг дэмжих чуулга уулзалтыг(WEDF) 2023 оны 6 дугаар сарын 26-28-ны өдрүүдэд Монгол Улсын Засгийн газар, Олон улсын худалдааны төв (ITC) хамтран зохион байгуулж байна.
Монгол Улсын Ерөнхийлөгч Ухнаагийн Хүрэлсүх чуулга уулзалтын албан ёсны нээлтэд оролцлоо.
Хөгжлийг хурдасгах худалдаа, экспорт, бизнесийг дэмжих зорилготой энэхүү уулзалтаар ногоон эдийн засаг, худалдаа, экспортыг дэмжих, жижиг, дунд бизнес эрхлэгчид тэр дундаа эмэгтэйчүүд, залуучуудын бизнес эрхлэх таатай орчныг бүрдүүлэх, цахим шийдлүүдийг санал болгох, сурталчлах, түгээн дэлгэрүүлэх болон бүс нутаг, олон улсын хамтын ажиллагааг өргөжүүлэх, шинэ зах зээл, шинэ боломжийг хэлэлцэж байна.
“Дэлхийн экспортыг дэмжих чуулга уулзалт”-д дэлхийн 70 орны 600 гаруй төлөөлөгч оролцож байна.
Чуулга уулзалтын эхний өдөр буюу 2023 оны 06 дугаар сарын 26-нд Далайд гарцгүй хөгжиж байгаа орнуудын бизнес эрхлэгчдийн зөвлөлдөх уулзалт, худалдааны дэд бүтэц, бүс нутгийн холболт, худалдааг хүртээмжтэй хөнгөвчлөх зэрэг сэдвээр дугуй ширээний уулзалт болсон.
Хоёр дахь өдрийн уулзалтаар залуучуудын бизнес, эрхлэлтийг нэмэгдүүлэх сэдвээр хэлэлцүүлэг өрнүүлж, ногоон бизнес болон төслүүдийг танилцуулах тэмцээн зохион байгуулах юм.
Тэмцээнд дэлхийн 63 орноос сонгогдсон залуу бизнес эрхлэгчид ногоон бизнесийн шийдэл, байгаль орчны нөхөн сэргээх санаачилга гэсэн хоёр төрлөөр өрсөлдөж байна.
Чуулга уулзалтын хүрээнд зохион байгуулсан хэлэлцүүлэг, бизнес уулзалтуудаас гарсан үр дүнг нэгтгэн 2023 оны сүүлээр эхлүүлэх Үндэсний экспортын стратегид тусгахаар төлөвлөжээ.
Чуулга уулзалтын үеэр болох онцлох үйл явдлууд:
• Далайд гарцгүй хөгжиж буй орнуудын худалдааны боломжууд: 6 дугаар сарын 26-нд болох хувийн хэвшлийн салбарынхны зөвлөлдөх уулзалтуудаас гарсан санал зөвлөмжийг 2024 онд болох Далайд гарцгүй хөгжиж буй орнуудын асуудлаарх 10 жилд нэг удаа болдог НҮБ-ын Сайд нарын уулзалтад танилцуулах болно.
• Экологид ээлтэй, ногоон шийдлүүдээ танилцуулан өрсөлдөж буй Залуу эко бизнес эрхлэгчдийн олон улсын уралдаан: НҮБ-аас зарласан Жижиг дунд бизнесийг дэмжих олон улсын өдөр буюу 06 дугаар сарын 27-нд өөрчлөлт, шинэчлэлийг манлайлж залуу бизнес эрхлэгчдийн дунд зарласан уралдааны шагналын эздийг тодруулна. Дэлхийн залуу эко-энтрепренёруудын уралдаан нь ногоон бизнесийн шийдэл, газрыг нөхөн сэргээх санаачлагуудыг онцлон харуулах болно. Эцсийн шатанд шагналын төлөөр өрсөлдөхөөр Бангладеш, Египет, Гана, Энэтхэг, Индонез, Мадагаскар, Монгол Улсаас өрсөлдөж буй бизнесүүд шалгарчээ.
• Mongolia SheTrades Hub-ийн нээлт: SheTrades нь эмэгтэйчүүдийн эдийн засгийн чадавхыг бэхжүүлэх зорилгоор Олон улсын худалдааны төвөөс санаачилсан хөтөлбөр бөгөөд энэхүү хөтөлбөрийн Монгол Улс дахь төвийн нээлт 6 дугаар сарын 28-нд болно. Ингэснээр Монгол Улс дэлхийн 10 гаруй улсад үйл ажиллагаа явуулж буй SheTrades хөтөлбөрт нэгдэж байна. Тус төв нь эмэгтэйчүүдийн бизнес эрхлэх чадавх, институцийг бэхжүүлэх, жендэрийн тэгш байдлыг хангахад чиглэсэн бодлогын орчныг сайжруулах замаар эмэгтэйчүүдэд практик сургалт явуулж, эмэгтэйчүүдийн бизнест ээлтэй орчныг бүрдүүлэхэд дэмжлэг үзүүлэх юм.
