Дэлхийн шилдэг технологиор, инновац шингэсэн, чанартай бүтээгдэхүүн үйлдвэрлэж, эх орныхоо хөгжилд томоохон хувь нэмэр оруулсан үндэсний үйлдвэрлэгчид Төрийн дээд шагнал одон, медаль хүртлээ.
Жилээс жилд нөхөн сэргээгддэг баялаг болох хонины ноосыг дэлхийд ховор шилдэг технологиор боловсруулан органик бордоо үйлдвэрлэж, гаднын улсуудад экспортлож буй “Монпеллетс” компанийн Ерөнхий захирал “Баялаг бүтээгчдийг дэмжих холбоо”-ны Дэд тэргүүн Б.Цогбадрахыг эх орныхоо хөгжил дэвшилд жинтэй хувь нэмэр оруулсан гэж үзэн Монгол Улсын Ерөнхийлөгч У.Хүрэлсүхийн зарилгаар төрийн дээд шагнал Хөдөлмөрийн Гавьяаны Улаан Тугийн одонгоор шагналаа.
“Монпеллетс” компанийн Ерөнхий захирал “Баялаг бүтээгчдийг дэмжих холбоо”-ны Дэд тэргүүн Б.Цогбадрах:
Эх орондоо хэрэгцээтэй зүйл бүтээх гэж шаргуу зүтгэсэн хөдөлмөрийг минь төр үнэлж, энэ шагналыг олгосон гэж бодож байна. Өнөөдөр маш их баяртай байна. Манай хонины ноосон бордооны үйлдвэр 2014 онд байгуулагдсан. Мэдээж шинэ зүйл эхлүүлнэ, үйлдвэр эрхлэнэ гэдэг тийм ч амархан ажил биш. Гэхдээ анх байгуулсан цагаасаа эхлэн энэ бүтээгдэхүүн маань заавал дэлхийд эрэлттэй, шилдэг бүтээгдэхүүн болно гэдэгт итгэж байсан. Ер нь үйлдвэрлэгч хүн ирээдүйдээ бүрэн итгэлтэй байх ёстой. Мөн ямар ч ажлыг эх оронч сэтгэлээр хийж байх нь чухал. Одоогийн байдлаар манай компани Герман, АНУ-руу хонины ноосон бордоогоо экспортлож, дотоодын хэрэглэгчиддээ ч танигдаж, эрэлт ихтэй байгаа. Мөн гаднын төрийн эрх мэдэлтнүүд, үйлдвэрлэгчид манай үйлдвэртэй танилцаж, туршлага судлан, хамтран ажиллах хүсэлтүүд ирүүлж байна. Тухайлбал хамгийн сүүлд Киргизийн Хүнс, хөдөө аж ахуйн сайд манай үйлдвэрт ирээд, өөрийн улсдаа манай технологийг нэвтрүүлж, заавал ийм үйлдвэр барина гээд явсан.
Монгол Улсад “Хүнсний хувьсгал” хийх томоохон ажил төрийн тэргүүний санаачлагаар өрнөж эхэлснээр үндэсний үйлдвэрлэгчид, баялаг бүтээгчид илүү идэвхтэй ажиллаж, хийж бүтээснээрээ олонд үнэлэгдэх болсон. Энэ хүрээнд төрийн дээд шагнал хүртэх үйлдвэрлэгчид болон үйлдвэрийн ажилчид нэмэгдсээр байна. Өнөөдөр /2023.07.03/ бас нэг бахархалт баялаг бүтээгч Алтан гадас одонгоор энгэрээ мялаасан нь “Очир дагинас” компанийн Ерөнхий менежер, Үүсгэн байгуулагч Ж.Доржханд юм.
“Очир дагинас” компанийн Ерөнхий менежер Ж.Доржханд:
Би “Очир дагинас” компанийг анх үүсгэн байгуулж байхдаа л Монгол малын махыг дэлхийн брэнд болгох зорилго тээж байсан. 20 жил шантралгүй хүнс үйлдвэрлэлийн салбарт ажилласан минь хамт олны тус, дэмжлэгийн ач гэж боддог. Манай компани жилээс жилд хөгжиж, дэвжихийн сацуу чанар стандартаа алдалгүй, улам сайжруулж, гадна, дотны нийт хэрэглэгчдэдээ хүргэж байгаа нь миний хувьд маш том баяр баясал. Бид саяхан Монгол Улсдаа анх удаа Нөөшилсөн буюу консервлосон махан бүтээгдэхүүнийг экспортод гаргах үйлдвэр барьж, нээлтээ хийсэн. Энэ бол бидний хийж бүтээх ажлын дөнгөж эхлэл байх болно.
Өнөөдөр үйлдвэр, үйлчилгээний салбараа төлөөлөн төрийн дээд шагнал авч байгаа үйлдвэрлэгчид дотоодын хэрэгцээгээ чанартай бүтээгдэхүүнээр хангахад хувь нэмэр оруулахаас гадна Дэлхийн зах зээлд гарч, монголд үйлдвэрлэсэн бараа бүтээгдэхүүний нэр төрийг өндөрт өргөж яваа үлэмж гавьяатай баялаг бүтээгчид юм.
