“Хүнсний хувьсгал” үндэсний хөдөлгөөн орон нутагт эрчимжиж байна. Аймаг тус бүр өөрсдийн онцлогт тулгуурлан дотооддоо үйлдвэрлэсэн эрүүл хүнсээр иргэдийнхээ хэрэглээг хангаж, цаашлаад хүнс экспортлогч нутаг болох зорилт тавин ажиллаж байна.

Дорнод аймаг хамгаалагдсан хөрсний үйлдвэрлэл, хүнсний нарийн ногооны нэр төрөл, тариалалтыг нэмэгдүүлэх, нэгж талбайгаас авах ургацын хэмжээг нэмэгдүүлэх, хүн амыг шинэ ургацын хүнсний ногоогоор тогтвортой хангаж, импортын хамаарлыг бууруулах, өрх бүр хашаандаа хүнсний ногоогоо тариалах боломжийг бүрдүүлэх зорилгоор “Арван мянган хүлэмж” төслийг хэрэгжүүлж байна.

Аймгийн Засаг даргын санаачилгаар хэрэгжиж буй энэхүү төсөл нь аймгийн Орон нутгийн төсвийн хөрөнгө оруулалтаар 2 дахь жилдээ хэрэгжиж байна. Төслийн хүрээнд хүнсний ногоо тариалан эрхлэгчдэд өнгөрсөн жил 311 хүлэмжийг олгосон бол энэ жил 400 хүлэмжийг олгож байна. Цаашид аймгийн нийт айл өрхийн 50 хүртэлх хувь буюу 2 өрх тутмын НЭГ нь хүлэмжээр хангагдана.

2022 онд аймгийн хэмжээнд нийт дүнгээр 743 ширхэг 28680 мкв талбай бүхий хүлэмжээс 53,5 тн ургац хураан авсан аж.

“Арван мянган хүлэмж” төслийн хүрээнд хүлэмжийн нийлүүлэлт эрчимтэй нэмэгдсэнээр жилээс жилд хүнсний ногооны тариалан эрхлэгчдийн өрхийн орлого дээшилж, Монгол ногооны хүртээмж нэмэгдэж, хамгаалагдсан хөрсний тариалалт өссөн зэрэг үр дүнгүүд гарч байгаа тухай аймгийн Хүнс, хөдөө аж ахуйн газраас мэдээллээ.