Монгол Улсын Ерөнхийлөгч У.Хүрэлсүх зарлиг гарган 26 жил тасралтгүй талх, гурилан бүтээгдэхүүнээр нутгийн иргэдээ эрүүл аюулгүй хүнсээр ханган ажиллаж байгаа Хан Хэнтийн ууган брэнд “БУРИАД” талхны үйлдвэрийн үүсгэн байгуулагч, баялаг бүтээгч Б.Дэлгэрмөрөнг “Аж үйлдвэрийн гавьяат ажилтан цол”-оор шагналаа.

1997 онд үүсгэн байгуулагдсан Хэнтий аймгийн “Хөвчийн Жонон” компани нутгийн брэнд бүтээгдэхүүн болсон буриад талхаа тасралтгүй 26 жил үйлдвэрлэж байгаа бөгөөд 6 төрлийн талх, 8 төрлийн нарийн боов үйлдвэрлэн 80 гаруй супермаркет, минимаркет, хүнсний дэлгүүрүүдэд нийлүүлж байна.

Өрхийн үйлдвэрлэлээс эхэлсэн бизнес өргөжиж одоогоор 60 гаруй хүнийг ажлын байраар хангасан компани болжээ. Тус компанийн үүсгэн байгуулагчид Хэнтий нутгийн уугуул, баялаг бүтээгч Ч.Амгалан, түүний гэргий Б.Дэлгэрмөрөн нар 10 жилийн ширээнээс амьдралаа холбож 3 хүүхэд, ач зээ нийлсэн өнөр олуулаа болж өнөөдөр төрөлх Хэнтий нутагтаа үйлдвэрлэл эрхэлж эх орныхоо хөгжилд хувь нэмрээ оруулж явна.