Монгол Улсын Ерөнхийлөгч Ухнаагийн Хүрэлсүх “Хүнсний хувьсгал” үндэсний хөдөлгөөн төслийн багийнхныг хүлээн авч уулзлаа.
Улс орныхоо хөгжлийн төлөө хүчин зүтгэж, ажлын байраа хадгалан, төр улсаа дэмжиж ирсэн бизнес эрхлэгч, баялаг бүтээгч, үндэсний үйлдвэрлэгчдээ сурталчилж төрөөс хэрэгжүүлж буй бодлого шийдвэрийг иргэдэд шуурхай хүргэн “Хүнсний хувьсгал”-д хувь нэмрээ оруулж буйд Монгол Улсын Ерөнхийлөгч талархал илэрхийлэв.
“Хүнсний хувьсгал” үндэсний хөдөлгөөн төслийн баг нь ““Хүнсний хангамж, аюулгүй байдлыг хангах талаар авах зарим арга хэмжээний тухай” Монгол Улсын Их Хурлын 36-р тогтоолын 5.К заалт “хоол, хүнсний зөв, зохистой, соёлтой хэрэглээний талаарх сургалт, сурталчилгаа, соён гэгээрүүлэх ажлыг зохион байгуулах”” ажлыг нэн тэргүүнд тавьж 2022 оны 6 сараас өнөөг хүртэлх хугацаанд 36-р тогтоолыг хэрэгжүүлэгч төрийн байгууллагууд болон олон улсын байгууллагууд, орон нутагт хийгдэж буй төсөл хөтөлбөрийг тухай бүрт нь олон нийтэд хүргэн, мөн үндэсний үйлдвэрлэгчид, баялаг бүтээгчдийн үйл ажиллагааг сурталчлан таниулах, тэдний дуу хоолойг төр засагт хүргэх ажлыг зохион байгуулан ажиллаж байна.
