Хүнс, хөдөө аж ахуй, хөнгөн үйлдвэрийн Сайдын 01 дугаар албан даалгавар “Мал эмнэлгийн урьдчилан сэргийлэх арга хэмжээг төлөвлөгөөт хугацаанд чанартай зохион байгуулах тухай” хэрэгжилтийг танилцууллаа.
Албан даалгаврын хэрэгжилтийг улс, аймаг, нийслэл, сум, дүүргийн түвшинд зохион байгуулан, гүйцэтгэж байна. Мал, амьтны гоц халдварт өвчний гаралт тархалтыг бууруулах, тэмцэх, отор нүүдэл , өвөлжилтийн хүндрэлийн улмаас зүй бусаар хорогдсон малын сэг зэмийг цуглуулж устгах, бэлчээр, бууц, хашаа, байр, уст цэг, усны эх булгийг цэвэрлэж халдваргүйтгэх ажлыг үр дүнтэй зохион байгуулах, хэрэгжилтийг эрчимжүүлэх, хяналтыг сайжруулах ажлыг 2023 оны 03 дугаар сараас эхлэн улс орон даяар эхлүүлсэн.
Зүй бусаар болон гамшгийн улмаас (Хэнтий, Сүхбаатар аймагт) хорогдсон малын сэг зэмийг цуглуулж устгах хашаа, хороо, өтөг бууц, худаг уст цэгийн орчны цэвэрлэгээ, халдваргүйтгэлийн ажлыг зохион байгуулан нийт 3,420 мянган малын, 11,4 мянган амьтны хүүр, сэг зэм, (золбин нохой, муур, зээр) устгалд оруулж гүйцэтгэл 90,2 % -тай байна.
Улсын хэмжээнд эхний хагас жилийн байдлаар 12,3 сая метр квадрат талбай (малын хашаа, хороо, худаг уст цэг, нийтийн эзэмшлийн талбай, түүхий эд бэлтгэх цэг, зоорь агуулах, тэжээлийн, устгалын цэг) зэрэг объектыг хамруулан орчны цэвэрлэгээ, халдваргүйжүүлэлт хийсэн.
Мөн аймаг, нийслэлийн мал эмнэлгийн газраас ”Орчны цэвэрлэгээ, халдваргүйтгэлийн сарын аян” зохион байгуулж уг ажилд сумын онцгой комисс, байгаль орчны улсын байцаагч, сумын мал эмнэлгийн тасаг, 1006 мал эмнэлгийн үйлчилгээний нэгжийн 1486 малын их, бага эмч, малчид нийт 3800 гаруй төрийн болон хувийн хэвшлийн байгууллага, малчид, мал бүхий иргэдийн хамтын оролцоог нэмэгдүүлэн, хамтран ажилласан.
Аяны хүрээнд нийслэл, орон нутагт байрлах 25 орчим мал төхөөрөх, мах боловсруулах үйлдвэр, хиамны цех, үхрийн ферм, нядалгааны газар, 133 түүхий эд бэлтгэх цэг, зоорь, агуулах, 2243 малын хашаа хороо, саравч, 406 худаг уст цэг болон нийтийн эзэмшлийн талбай, хүнсний зах, худалдааны төвүүдийн нийт 2,9 сая метр квадрат талбайд орчны цэвэрлэгээ, халдваргүйтгэлийн ажлыг зохих заавар, стандарт зөвлөмжийн дагуу гүйцэтгэлээ.
