Ерөнхийлөгчийн Үйлдвэр, үйлчилгээний бодлогын зөвлөх Ч.Даваабаяр, Ерөнхийлөгчийн Эдийн засгийн бодлогын зөвлөх Б.Даваадалай нар Дэлхийн банкны ХАА-н Ахлах эдийн засагч Ситарамачандра Мачиражү болон бусад төлөөллүүдтэй уулзалт зохион байгуулж, тус байгууллагаас хүнс, хөдөө аж ахуйн салбарт шинээр хэрэгжүүлэх төсөлтэй нь танилцан, мэдээлэл солилцлоо.
Монгол улс 1991 оны 2-дугаар сард Дэлхийн Банкны гишүүн орон болсон бөгөөд 2021 онд Монгол Улс – Дэлхийн Банкны түншлэлийн 30 жилийн ой тохиосон юм. Олон Улсын Хөгжлийн Ассоциаци нь 1991 оноос хойш Монгол Улсад хөдөөгийн хөгжил, боловсрол, Улаанбаатар хотын хөгжил, уул уурхайн салбарын удирдлагын тогтолцоог сайжруулах, байгаль орчны хамгаалал, бодлого боловсруулах болон бусад чиглэлээр Монгол Улсын хөгжлийг дэмжин ажиллаж ирсэн.
Өнгөрсөн 30 жилийн хугацаанд Дэлхийн Банк нь Монгол Улсад 1.6 тэрбум гаруй ам.долларын хөгжлийн санхүүжилт олгоод байна.
Дэлхийн Банк нь зээл болон буцалтгүй тусламжаас гадна Монгол Улсын дунд болон урт хугацааны хөгжлийн зорилтыг дэмжих, стратегийн гол чиглэлээр засгийн газраас явуулах шинэчлэлийг дэмжихээр чадавхыг бэхжүүлэх хүрээнд аналитик болон зөвлөх үйлчилгээ үзүүлдэг. Энэ хүрээнд Монгол Улсын Ерөнхийлөгчийн санаачилсан “Хүнсний хангамж, аюулгүй байдал” үндэсний хөдөлгөөнийг дэмжин ажиллах боломжтой гэдгийг илэрхийлж байв.
Тухайлбал малын гаралтай түүхий эдээр дэлхийн стандартад нийцсэн бүтээгдэхүүн үйлдвэрлэж, экспортод гаргах, нийлүүлэлтийн сүлжээг бий болгох, олон сумдыг нэг кластер болгон үйлдвэрлэлийг хөгжүүлэх ажлын хүрээнд хамтран ажиллах боломж бий гэв.
