Ерөнхийлөгчийн Үйлдвэр, үйлчилгээний бодлогын зөвлөх Ч.Даваабаяр Монгол Улсын Үйлчилгээний гавьяат ажилтан, ММТХ-ны Ерөнхийлөгч Л.Буяндэлгэрийг хүлээн авч уулзан, “Хүнсний хангамж, аюулгүй байдал” үндэсний хөдөлгөөнийг хэрэгжүүлэхэд хоол үйлдвэрлэлийн салбарын үүрэг оролцооны талаар санал солилцлоо.
Мөн энэ үеэр Монгол Улсын Үйлчилгээний гавьяат ажилтан, ММТХ-ны Ерөнхийлөгч Л.Буяндэлгэр 2023 оны 09-р сарын 13-наас 09-р сарын 16-ны хооронд зохион байгуулагдах “Чингис хааны цом-2023” олон улсын хоолны фестивалийн бэлтгэл ажил болон, ач холбогдол, үр дүнгийн танилцуулга хийв.
Тус арга хэмжээ нь Монгол Улсад зохион байгуулагдаж байгаа анхны Олон Улсын, Өндөр хэмжээний тэмцээн бөгөөд хоёр жилд нэг удаа зохион байгуулагддагаараа онцлог. Цар тахлын улмаас дөрвөн жил завсардаж, энэ жил зэрэглэл ахиулан, өргөн хэмжээнд зохион байгуулахаар төлөвлөж байна.
Тухайлбал 2017 онд нийт 6 улс, 2019 онд нийт 11 улс орны баг тамирчид оролцож байсан бол энэ жил дэлхийн 16 орны баг тамирчид оролцохоор бүртгүүлжээ.
Арга хэмжээний хүндэт зочноор:
- Дэлхийн тогооч нарын холбооны Ерөнхийлөгч Томас Гүглэр
- Дэлхийн тогооч нарын холбооны Азийн бүсийн Тэргүүн Вилмэнт Лүн
- Дэлхийн Ислам шашинт улс орнуудын Кулинарын холбооны Ерөнхийлөгч Тахир Амирасланов нар оролцох юм.
“Чингис хааны цом-2023” олон улсын хоолны фестивалийг амжилттай зохион байгуулснаар монгол үндэстний хоолны төрлийг дэлхийд хүлээн зөвшөөрүүлж олон улсын чансааны тэмцээнүүдэд монгол хоолны шинэ төрлийг нэмэгдүүлэх, Монгол хоолыг дэлхийд таниулж сурталчлах боломж бүрдэнэ гэж үзэж байна.
