ХААИС-ийн 66 дахь хичээлийн шинэ жилийн нээлтэд Монгол Улсын Ерөнхийлөгч У.Хүрэлсүх болон БШУ-ны сайд Л.Энх-Амгалан тэргүүтэй төлөөлөгчид оролцлоо. Тодруулбал Монгол Улсын Ерөнхийлөгч хүнс, хөдөө аж ахуйн салбарын хөгжилд онцгой ач холбогдол өгч байгаа бөгөөд боловсон хүчин болох, ирээдүйн оюуны баялаг бүтээгчдэд болон тэднийг бэлтгэн гаргаж буй эрдэмтэн багш нарт мэндчилгээ дэвшүүллээ.
Энэ удаагийн хичээлийн шинэ жил нь маш онцлогтой болохыг БШУ-ны сайд Л.Энх-Амгалан хэлж байв. Учир нь Монгол Улсын Засгийн газар, Боловсрол, шинжлэх ухааны яамнаас 2023-2024 оны хичээлийн жилийг “БОЛОВСРОЛЫН ШИНЭ СЭРГЭЛТ-ийн жил болгон зарлаж, боловсролын түүхийн шинэ хуудсыг эхлүүлж байгаа юм.
ХААИС нь 2023-2024 оны хичээлийн жилд тэргүүлэх чиглэл бүхий 45 мэргэжлийн хөтөлбөрөөр мэргэжилтэн бэлтгэж байгаа бөгөөд эдгээр нь Монгол Улсын эдийн засгийг төрөлжүүлэх ХАА-н салбарын хөгжилд шаардлагатай мэргэжлүүд юм.
Монголын ард түмний хүнсний хангамж, аюулгүй байдал, цаашлаад улс орны үндэсний аюулгүй байдалд тус салбарын эрдэмтэн судлаачдын оролцоо онцгой чухал ач холбогдолтой юм. Иймд “Хүнсний хангамж, аюулгүй байдал” үндэсний хөдөлгөөнийг шинжлэх ухаанд тулгуурлан, амьдралд бүтээлчээр үр дүнтэй хэрэгжүүлэх зорилгоор “Хүнс, хөдөө аж ахуйн салбарын Эрдэмтдийн Зөвлөл”-ийг байгуулан ажиллах шийдвэр гарсныг энэ үеэр онцоллоо.
ХААИС нь бүрэлдэхүүний 6 сургууль, орон нутгийн салбар 2 сургууль, Монгол Улсын тэргүүлэх 4 эрдэм шинжилгээний хүрээлэнтэй, бакалавр, магистр, докторын шаталсан сургалтад 10.000 гаруй оюутан суралцаж, 1200 гаруй эрдэмтэн судлаачид ажиллаж байгаа төрийн өмчийн ууган сургуулийн нэг юм.
