Монгол Улсын Ерөнхийлөгчийн Үйлдвэр, үйлчилгээний бодлогын зөвлөх Ч.Даваабаяр “Копиа монгол төв”-ийн захирал У Мён Гү болон тус төвийн мэргэжилтнүүдтэй уулзаж, Монгол Улсад үрийн хороо байгуулах, смарт хөдөө аж ахуйг хөгжүүлэх боломж нөхцөл, БНСУ-аас Монгол Улсад сонгинын үр нийлүүлэх талаар ярилцаж, санал солилцлоо.
“Хүнсний хангамж, аюулгүй байдал” үндэсний хөдөлгөөний хүрээнд УИХ-ын 36-р тогтоолын хэрэгжилтийг хангахад Бүгд Найрамдах Солонгос Улсын засгийн газрын буцалтгүй тусламжаар 2014 оноос эхлэн Монгол Улсын хөдөө аж ахуйн салбарт нийт 20 орчим төслийг хэрэгжүүлээд буй “Копиа монгол төв”-тэй хамтран ажиллаж байгаа бөгөөд энэхүү харилцаа улам бэхэжсээр байна.
Тус төв нь нийт 23 улсад үйл ажиллагаа явуулдаг. Монгол Улс дахь салбарын хувьд БНСУ-ын ХАА-н дэвшилтэт технологийг нутагшуулах, судалгаа шинжилгээний ажлыг санхүүжүүлэх, хөдөө аж ахуйн үйлдвэрлэл эрхлэгчдийг чадавхжуулах чиглэлээр төсөл хөтөлбөрүүд хэрэгжүүлж байна.
“Копиа монгол төв”-ийн үйл ажиллагаа цар хүрээгээ тэлж буй энэ цаг үетэй давхцан Монгол Улсын Ерөнхийлөгч хүнс, хөдөө аж ахуйн салбартаа эрс шинэчлэлт хийх, хөгжүүлэх эрхэм зорилго бүхий “Хүнсний хангамж, аюулгүй байдал” үндэсний хөдөлгөөнийг санаачлан, олон төрлийн бодлого шийдвэр гаргаж, практикт хэрэгжүүлж эхэлсэн нь хамтын ажиллагааны алтан боломж болж буйг тус төвийн захирал У Мён Гү уулзалтын үеэр онцлов.
Мөн өнгөрсөн сарын 10, 11-ний өдөр зохион байгуулагдсан “Копиа монгол төв”-ийн 2023 оны хагас жилийн талбайн мониторинг болон Дархан-Уул аймагт хамтран ажилласан үйл ажиллагаанууд амжилттай болсон нь томоохон урам зориг өгч, дараагийн шатны арга хэмжээнүүдийг төлөвлөх суурь болжээ.
