Өвөрхангай аймгийн Хүнс, хөдөө аж ахуйн газраас ургац хураалтын явцын талаар мэдээлэл хийлээ. Энэ онд аймгийн хэмжээнд нийт 12280 га талбайд тариалалт хийх зорилт дэвшүүлснээс 13293 га талбайд тариалалт хийж 1013 га талбайгаар нэмэгдсэн.
Энэ жилийн хувьд 4, 5, 6 дугаар саруудад хүйтэн сэрүүхэн, хөрсний температур нь үр суух хэмжээнд хүрч дулаарахгүй байсантай холбоотойгоор хаврын тариалалт оройтож эхэлсэн. Үүнд улаан буудай 5814 га, бусад үр тариа 58 га, төмс 433.4 га, хүнсний ногоо 302.3 га, жимс жимсгэнэ 23.5 га, малын тэжээл 4217 га, тосны ургамал 2444 га-д тус тус тариалж нийт 13292 га талбайд тариалалт хийсэн байна.
Урд оноос хүнсний ногоо 20 га, малын тэжээл 1520 га, тосны ургамал 340 га талбайгаар тус тус өссөн дүнтэй байна.
Ургацын баланс:
2023.08.18-21-ний өдрүүдэд ургацын урьдчилсан баланс тогтоох, хураалтад ажиллах хүн хүч, уринш, техникийн бэлэн байдал, ургацын төлөв байдал, салбарт хэрэгжиж буй бодлого, үйл ажиллагаатай танилцах ажлаар газар тариалан бүхий Хархорин, Өлзийт, Бүрд сумдад ажиллалаа.
Үүнд:
- Үр тариа нэгжээс 9цн буюу 4806 га-аас 4325.4тн,
- Улаан буудай 9цн буюу 4764 га-аас 4287.6тн,
- бусад үр тариа 8цн буюу 40.6 га-аас 32.4тн,
- малын тэжээл 12 цн буюу 3977 га-аас 4175.8тн,
- төмс 90цн буюу 418 га-аас 3762тн,
- хүнсний ногоо 93цн буюу 293 га-аас 2724.9тн,
- тосны ургамал 3цн буюу 1469 га-аас 440.7 тн тус тус хураан авах урьдчилсан баланс гараад байна.
Мөн энэ жилийн хувьд цаг агаарын тааламжгүй байдлаас болж нийт 2305 га талбай буюу нийт талбайн 17.3 хувь мөндөрт цохигдож үр тариа 1066 га, улаан буудай 1050 га, бусад үр тариа 16 га, малын тэжээл 240 га, тосны ургамал 975 га, төмс 15.4 га, хүнсний ногоо 9.3 га талбай тус тус нэрвэгдэж, малын тэжээлд 1066 га шилжээд байна.
Улаанбуудай аарцан болцын үе шатанд байгаа бөгөөд цаг агаар хэвийн байвал 9 дүгээр сарын дунд үеэс ургац хураалт эхлэх төлөвтэй байна. Мөн төмс, хүнсний ногооны хувьд түүвэр хураалт үргэлжилж, Арвин худалдааны төв болон захын бөөний дэлгүүрүүдээр борлуулалт хийж байна.
Таримал ургамлыг ургамлын өвчин, хөнөөлт шавжаас хамгаалах, урьдчилан сэргийлэх, цочир хүйтрэлтийн үед хяруунаас хамгаалах арга ажиллагаа, ургац хураалтын үед баримтлах технологийн ерөнхий зөвлөмжөөр тогтмол ханган ажиллаж байна.
2023.09.04-ний байдлаар “Хархорин Жи-Эн-ЭФ холдинг” ХХК мөндөрт цохигдсон 240 га талбайгаас сүрэл боож, 1 боодлын үнийг 5000 төгрөгөөр борлуулж байна.
