Монгол-Хятадын дөрөв дэх удаагийн экспо БНХАУ-ын ӨМӨЗО-ны Хөх хотод болж байна. Уг үзэсгэлэн нь хоёр жилд нэг болдог бөгөөд дэлхий нийтийг хамарсан Ковид-19 цар тахлын улмаас тасалдаад байсныг ийнхүү сэргээлээ. Энэ удаагийн үзэсгэлэн “Нээлттэй шинэ тогтолцоог хамтран байгуулж, хөгжлийн шинэ боломжийг хамтдаа хуваалцья” уриатайгаар явагдаж байна.
09-р сарын 06-10-ны өдрүүдэд болох Монгол-Хятадын худалдааны дөрөвдүгээр экспод 35 улс, БНХАУ-ын орон нутгийн 27 төлөөлөл, нийт 3000 гаруй аж ахуйн нэгж оролцож бараа бүтээгдэхүүнээ танилцуулах юм.
Үзэсгэлэнд Шадар сайд С.Амарсайхан, УИХ-ын Дэд дарга С.Одонтуяа, Монгол Улсаас БНХАУ-д суугаа Элчин сайд Т.Бадрал, УИХ дахь Үйлдвэржилтийн бодлогын байнгын хорооны дарга Т.Энхтүвшин, УИХ-ын гишүүн Б.Бейсен, ХХААХҮ-ийн сайд Х.Болорчулуун, Зам Тээврийн Хөгжлийн сайд С.Бямбацогт, ХХААХҮ-ийн дэд сайд М.Ганхүлэг нарын тэргүүтэй албаны зочид, 500 орчим ААН, байгууллагын төлөөлөл оролцож байна
Экспогийн гол зорилго нь хоёр улсын харилцаа хамтын ажиллагааг бизнесийн салбарт хөгжүүлэх, Монгол улсын жижиг дунд үйлдвэрлэл эрхлэгчдийн бараа бүтээгдэхүүнийг БНХАУ-ын зах зээлд экспортлоход дэмжлэг үзүүлэх, Засгийн газрын гол бодлогын нэг “Монголд зочлох жил” хөтөлбөрийн хүрээнд жуулчдын тоог өсгөх, худалдааны эргэлтийг нэмэгдүүлэх зэрэг давуу талтай юм.
